АҞӘА, рашәарамза 7 – Sputnik, Роберт Џьопуа. Аминистрцәа реилазаара аилатәараҟны ирыдыркылеит асоциалтә политика аусхк аҟны аӡбрақәа. Урҭ ируакуп ахәыҷы шықәсыки бжаки ихыҵаанӡа изыршәо аԥара. Иахьатәи аамҭазы иара иартәоит х-нызқьмааҭ. Абри азы иахәҭаз ариашарақәа аларгалеит Аминистрцәа Реилазаара.
Шықәсыки бжаки рҟынӡа зхыҵуа ахәыҷқәа рзы ашәарақәа ирылагоит ԥхынгәы 1 2017 шықәса инаркны.
Аԥсны Аҳәынҭқарра асоциалтә ԥгаԥсеи аџьа ахьчареи Рфонд ахантәаҩы Амиран Какалиа иазгәеиҭеит абри Ақәҵара апроект анра адгылареи ацхыраара аҭареи ишырзырхо. Убас иазыԥхьагәаҭоуп, шықәсыки бжаки рҟынӡа зхыҵуа ахәыҷқәа рзы ишшәалахо есымза х-нызқь мааҭ аԥара.
Уаанӡа иара иартәон ҩ-нызқь мааҭ.
"Афонд азыхиоуп абарҭ ахыдҵақәа рынагӡара. Ашәарақәа хацыркхоит ԥхынгәы 1 2017 шықәса инаркны. Ажьырныҳәа 1 2018 шықәса инаркны иазыԥхьагәаҭоуп ари ахыԥхьаӡара еиҳагьы аизырҳара", — иҳәеит Какалиа.
Иара убасгьы аилатәараҟны уаанӡа СССР ажурналистцәа Реидгыла иалахәыз иахьазы Аԥсны ажурналистцәа Реидгыла иалахәылацәоу ҩба-ҩба нызқьмааҭ рызшәара атәы шьақәдырӷәӷәеит.
Асиа инақәыршәаны дара 29-ҩык ыҟоуп.
Аԥсны аусураҭареи асоциалтә еиқәыршәареи рминистр Руслан Аџьба аҳәамҭа ҟаиҵеит актәи агәыԥ иаҵанакуа аинвалидцәа рсиа аҽа ԥшьҩык шацлаз, урҭ ацхыраагӡатә ԥара жәаба-жәаба нызқь шроуло.
Аԥара шәалахоит Ареспубликатә биуџьет аҟынтәи.
