Аԥсуа бызшәеи аԥсуареи ирызҿлымҳау ҳџьынџьуаа: аԥсуа қыҭа Бычка аԥсҭазаара

© Foto / Сырма АшәԥҳаҬырқәтәылатәи аԥсуа қыҭа
Ҭырқәтәылатәи аԥсуа қыҭа - Sputnik Аҧсны
Анапаҵаҩра
Ҭырқәтәыла, Ҳендеқь иаҵанакуа Бычкы ақыҭаҿы инхоит 300 ҭӡы инарзынаԥшуа аԥсуаа. Раԥсуара акәзар, акырӡа пату ақәҵаны иныҟәыргоит. Уи ус шакәу шьақәдырӷәӷәоит, Бычка ақыҭа инхо ҳзыҿцәажәаз ауаа.

Sputnik, Сырма Ашәԥҳа

"Сара сабду Аԥснынтә ахҵәара дақәшәеит. Ианаамҭаз, ҳаиҳабацәа рыԥсы анҭаз ирҳәоз ажәабжьқәа, ирдыруаз аҭоурых ҳазыӡырҩызҭгьы иаҳдыруаз рацәахон. Аха, усҟан уиаҟара ҳзеилкаауамызт, уажәы ицахьо аамҭа ҳзырхынҳәуам. Сара сан д-Қапбҳан, санду Аҩӡԥҳан", — дҳацәажәон Меҭин Қәачба (Аӡынба).

Меҭин иԥшәмаԥхәыс лазуп, аха аԥсшәа аҷҷаҳәа илҳәоит. Лан лбызшәа акыр дазгәыдууны дҳацәажәон. 

Маҳинур Папааԥҳа - Sputnik Аҧсны
Маҳинур Папаԥҳа: Баграт Шьынқәба иажәеинраалақәа ҿырҳәала исҵон

"Сара сан Бигәааԥҳауп, санду Мазаҳаԥҳауп, схаҭа слазуп. Сара сандуи сабдуи Аԥснынтә ихҵәаны иааит, усҟан дара хәычқәан. Ара, Ефҭениа ҳәа иахьашьҭоу ақыҭаҿы иаанагеит. Саб иан Мазаҳаԥҳауп. Ари ақыҭаҿы  аԥсуаа сырҭацоуп, ҩыџьа апацәеи, ԥҳаки сымоуп, смоҭацәагьы ирызҳауеит. Сара аҩны иҵәахны исымоуп Аԥснынтә иааз санду лычуан. Иара еиқәаҵәаӡах иҷышәны иҟан, нас исшәит, исырҿыцит. Ақәабгьы сымоуп санду илтәышьҭраны. Анкьа ауаџьаҟқәа ҳаман, амца еиқәҵаны, архнышьна ныкнаҳаны ачуан аҟны абысҭа ҳуан, ашәеилаҵақәа ҳарҩон. Сыхшара аԥсшәа бзианы еилыркаауеит, хар рымамакәагьы рхатәы бызшәала ицәажәоит", —абас лаԥсшәаҳәашьа акырӡа иџьашьаны ҳалзыӡырҩуан алаз ԥҳәыс. 

Бычка ақытаҿы инхо аԥсуаа атәым милаҭ рыланхӡом, пату еиқәҵаны, реиҳабацәа ирҿырҵааз ақьабзқәа ирықәныҟәоит. 

"Сара Бычка аҩнра сааит, сахьиз сқыҭа Цхьынароуп. Ҳабдуцәа Аԥснынтәи иааит. Ҳаиҳабацәа ирҳәо ауп араҟа имҩасуа, аԥсуара  цәгьа игәаҳҭоит, иныҟәаҳгарц ҳаԥхныҩлоит.  Аиҳаби аиҵби реизыҟазаашьа ҳаҭыр ақәуп. Ҳаиҳабацәа рҿы ҳцәажәаӡом. Ҳанхәа лҿы ҳцәажәозаргьы, ҳабхәа иахьиаҳауа ҳабжьы ҳаргаӡом, ҳцәырҵӡом. Ҳабхәында еиҳабы иҿы ҳхәыҷы даҳкӡом, ҳаԥшәма иааигәа ҳнеиӡом аиҳабацәа аныҟоу. Ҳахшарагьы абарҭқәа ҟарҵарц ҳҭахуп.

Ҭырқәтәыла иҟоу Ианық ақыҭаҿы инхо, аублаа ирҭацоу ҳџьынџьуаҩ Шьеқрие Лазариаԥҳ - Sputnik Аҧсны
Шьеқрие Лазариаԥҳа: Аԥснынтә аԥсуаа рбара даара ҳазгәыдууп

Ҳабдуцәеи ҳандуцәеи Аԥснынтә ихҵәаны Ҭырқәтәыла ианықәнагала цәгьа аџьабаа рбеит. Бнарак инылатәагәышьеит, инхар акәхеит, инҵыр акәхеит. Уи азы аҭагылазаашьа ыҟамызт, ахеиқәырхара цәгьан. Ишәымдыруеи, шаҟаҩы изҭашәаз агәаҟра рызхымгакәа иҭахақәаз. Жәлала рҽеидкыланы ақыҭақәа шьақәдыргылеит. Усҟантәи аамҭазы ҽыла акәын аныҟәарақәа шымҩасуаз, уажәы аихауардынқәа ыҟагәышьоуп. Сан лан д-Бигәааԥҳан. Саб иан Уанаҿаԥҳан, сыԥшәма иан Лакырԥҳауп. Бычка инхо аԥсуа жәлақәа егьмаҷым: Қәачаа, Жьиаа, Аӡынаа, Дохәмаа, Гамсаниаа, Хәацаа, Қапаа, Еминаа, Абашьаа ухәа ирацәоуп.

Адгьылқәа рацәаны иҳаҵакуп. Аџьықәреи лаҳҵоит, ача лаҳҵоит, араса рацәаны иҳамоуп. Сара сабду Папаа, 15 шықәса анихыҵуаз дааит. Уи ианду Ԥынҵачааԥҳан. Ԥынҵачааԥҳа рыцҳа, ацә уардын сабду дақәыртәаны дҵәахны дахыргеит. Ахҵәара ҳԥеиԥшмызтгьы, ҳауаажәлар, ҳашьцәа ахьынхо Аԥсны ҳанхагәышьозаарын, аха ус ҳалахь ианымызт. Аԥснынтә шәаан ҳажәбоит, ҳшәаҳауеит, Анцәа абзиарақәа рацәаны ишәзааигааит. Аԥсыуак Аԥснынтә дааит ҳәа анҳаҳалак ҳхәы-ҳжьы ааилагылоит", — лгәы ԥшаауа дцәажәон зыуаҩыбжара иҭысхьоу Еԥеқь Папааԥҳа.

Орҳан Ашамба иԥҳа Зеррин Шамԥҳа - Sputnik Аҧсны
Зеррин Шамԥҳа: "Ацынҵәарах" санаԥхьо даҽакала сҟалоит, ҿыц саԥхьоушәа исзааиуеит

Бычкы инхо аԥсуаа ҭыԥла еизааигәоуп, агәылеи-агәылеи еицхыраауеит. Асас дырҭаар, гәаартыла иԥылоит. Дара ишырҳәо ала, сасык ашҭа дахьҭамлаз, уи ԥсҭазаарам. 

"Атәым милаҭ ҳазланхо рыбызшәа шаҳҳәоз, ҳабызшәа акыр ҳацәыхьшәашәахеит. Ҳара ҳнаҩс изызҳауа ҳахшара ҳара иныҟәаҳгақәо ирыцырҵарц ҳҭахуп. Сабду сихааным, аха санду рыцҳа илҳәо саҳахьан Аԥсны аӡбахә. Алакә еиԥш иҳадаҳкылон усҟан. Уахьынамӡауа, ахаан иахьаҳамбаша џьара иҟазшәа акәын ишаҳзааиуаз. Иахьа, Анцәа иџьшьаны, аиҭанаиааирақәа ҳабжьоуп. Егьа бзиара умазаргьы, уахьааҭыҵыз убаргьы, иумбаргьы ахьаа угәы иадыруеит. Сара сыхшара Аԥсны ргәыӷырҭаны иҟазарц сҭахуп. Сыԥсы ахьынӡаҭоу аԥсуа бызшәа сгәы иҭымҵәар сҭахуп, абжьы саҳаларц сҭахуп, еснагь агәхьаагара сыцуп. Сыуаажәлар срыкәыхшоуп. Аԥсныҟа салам сҳәоит!", — лыгәҭыхақәа ҵыхәаԥҵәара рымамызт Бычка ақыҭаҿы инхо Суаҭ Аҩӡԥҳа. 

Ажәабжьқәа зегьы
0