АҞӘА, рашәара 29 – Sputnik. Урыстәыла зҽаԥсазтәыз артистка, Аԥсны жәлар рартистка Алиса Гыцԥҳа агерцогиниа Леонора лроль налыгӡоит Джузеппе Верди и-"Трубадур" аҟны. Абри атәы аанацҳауеит РИА Новости.
Алиса Гыцԥҳа Верди ирҿиамҭа уаанӡа иналмыгӡацызт. Лара уажәы уи лҽалыршьцылоит.
Амцабз ҟаԥшь, ишу аиха, афырхацәа ишьаарку рцәамаҭәа, милитари астиль иатәу акостиумқәа – абасоуп Верди и-Трубадур шибо атеатр асахьаркыратә напхгаҩы, аоператә режиссиор Дмитри Бертман.
"Трубадур" "Геликон-опера" арепертуар иалагалоуп раԥхьаӡа акәны.
"Ари аопера ахәаԥшцәагьы ахәмарыҩцәагьы бзиа еицырбо рҿиамҭоуп. Ҳара иара ҳазхьаԥшит избанзар иара иахьагьы ҳаамҭа иақәшәо иҟоуп. Иахьа адунеи аҿы ауаҩы ауаҩы дишьуеит. Ҳара зегь ҳаишьцәоуп, ҳуаауп. Аха аҭынч ԥсҭазаара зҭаху ауаа шамахамзар аӡәгьа иашьҭоу ирҿаҵахәхоит. Ҳақәыргыламҭаҟны абри ауп еиҳа ҳаззааҭгылаз", ҳәа Бертман иажәақәа аанагоит РИА Новости.
Аспектакль аԥҵара иалахәуп: изныкымкәа "Трубадур" адирижиорра азызухьоу испаниатәи амаестро Оливер Диаз, асахьаҭыхыҩцәа Игор Нежныии Татиана Толубиевеи, ахореограф Едвальд Смирнов.
Бертман иазгәеиҭоит аспектакль иалахәу "Геликон-опера" артистцәа рымацара шракәу.
