АҞӘА, рашәара 29 – Sputnik. Аԥсны Ахада Рауль Ҳаџьымба рашәара 28 рзы аилацәажәара мҩаԥигеит атәылауаҩшәҟәқәеи анхараз азиншәҟәқәеи рыҭара азҵаара иадҳәаланы, адҵагьы ҟаиҵеит атәылауаҩшәҟәқәеи анхараз азиншәҟәқәеи рыҭара ырццактәуп ҳәа. Абри атәы аалыцҳаит атәыла Ахада ипресс-маӡаныҟәгаҩ Наала Аҩӡыԥҳа.
"Рауль Ҳаџьымба адҵа ҟаиҵеит атәылауаҩшәҟәқәеи анхараз азиншәҟәқәеи рыҭара дырццакырц. Аҩныҵҟатәи аусқәа рминистрра анапхгара атәыла Ахада адырра ирҭалоит русура амҩаԥысшьазы", — лҳәеит Аҩӡыԥҳа.
Апресс- маӡаныҟәгаҩ иара убасгьы иазгәалҭеит, ареспублика араионқәа рҟны аус зуа апаспорттә столқәа реиҳабацәа Рауль Ҳаџьымба адырра ирҭеит ирырҭахьоу атәылауаҩшәҟәқәа рхыԥхьаӡарази аҭараз ихианы иҟоу рзи.
