АҞӘА, рашәара 29 – Sputnik, Амра Амҷԥҳа. 1922-ҩык аушьҭымҭацәа рҟынтәи жәҩыуаак ахьтәы медалқәа рыманы иалгеит. Ибзиаӡоуп ҳәа иалгеит 54-ҩык. Аԥсны Ахада ихьӡала 2017 шықәсазтәи аушьҭымҭацәа дрыдныҳәалеит атәыла Ахада иабжьгаҩ Владимир Занҭариа.
Иара иқәгылараҿы иазгәеиҭеит Аԥснытәи аушьҭымҭацәа Урыстәылатәи аҵараиурҭақәа рҟны ақәҿиара бзиаӡақәа шаадырԥшуа.
"Рыԥсадгьыл ахь ихынҳәуеит адырра бзиақәа рыманы. Ҳҿар ҳдыргәырӷьоит аспорт, аҟазара русхк аҿы. Аконкурс "Ты супер!" аҟны аиааира згаз Валериа Адлеиԥҳа лтәы мацара абанӡанаӡоу. Уажәы лассы-лассы лыӡбахә саҳауеит аҽа еҵәа хәыҷык — Милена Барцыцԥҳа. Зегьы ишәзеиӷьасшьоит ақәҿиарақәа", — иҳәеит иара.
Аушьҭымҭацәа убла хыркуа иԥшӡа-ԥшӡаӡа еиҿкаан. Зегьы даарылукаауа деибыҭан Аҟәатәи абжьаратә школ №4 аушьҭымҭа Зураб Ҭыжәба: уи аԥсуа маҭәа шкәакәала деилаҳәан. Асценаҿ акәзар иара даԥхьон Баграт Шьынқәба иажәеинраала.
Амедалистцәа фҩык: Роберт Бостанджиан, Садиа Занҭариаԥҳа, Зураб Ҭыжәба, Расида Миквабиаԥҳа, Александр Чкадуа, Алмас Шьалашьаа Урыстәылатәи аҵараиурҭақәа ирҭалахьеит. Егьырҭ — Адгәыр Амԥар, Есма Гьерзмааԥҳа, Леонардо Гәынба Аԥснытәи Аҳәынҭқарратә университет аҭалара рыгәҭакуп.
"Шәеиҳабацәа пату рықәышәҵала, ишәеиҵыбцәоу рзы шәҿырԥшыгаз", — иҳәеит аҿар рымҩа ныҳәо Ҷлоутәи ашкол ахьтәы медалла иалгаз Зураб Шьалашьаа иаб.
Аушьҭымҭацәа рыхьӡала арҵаҩцәа, аминистрра ҭабуп ҳәа реиҳәеит Гагратәи ашкол № 2 аушьҭымҭа, Бауман ихьӡ зху МГТУ астудент Роберт Бостанджиан.
