АҞӘА, ԥхынгәы 3 — Sputnik, Сырма Ашәԥҳа. Акультуратә цәыргақәҵатә центр "Табакалер" аҿы имҩпаԥысуеит афранцыз режиссиор Ерик Бодлер ицәыргақәҵа. Ацәыргақәҵа аҳәаақәа ирҭагӡаны иӡыргоуп афильм "Асалам шәҟәқәа Мақс иахь" захьӡу, иара убас Аԥсны акультура ахаҭарнакра "Не посольство Абхазии".
"Жәларбжьаратәи афонд Аԥсны" ахада ихаҭыԥуаҩ Мақсим Ӷәынџьиа иусбарҭаҿы идикылоит хыԥхьаӡара рацәала асасцәа, урҭ рыбжьара иҟоуп ажурналистцәа, аҭҵааҩцәа, афилософцәа, иара убас Аԥсны акультура, иааидкыланы атәыла аҿатә ԥсҭазаара иазҿлымҳау зегьы.
Зыӡбахә азгәаҭоу апроект "Не посольство Абхазии" хацыркын 2014 шықәса рзы, Париж.
"Хышықәса ирылагӡаны Аԥсны акультура ахаҭарнакра ӡыраҳгон Норвегиа, Еиду Америкатәи Аштатқәа, Арабтәи Аемиратқәа, иахьа ҳара ҳаҟоуп абаскқәа ртәыла. Ерик Бодлер, егьырҭ иусумҭақәагьы акыр аинтерес рыҵоуп. Урҭ иаадырԥшуеит аҳәынҭқаррақәа, ажәларқәа рзы идырым афактқәа", — ҳәа азгәеиҭеит Мақсим Ӷәынџьиа.
Абаскцәа, Аԥсны апроблемақәа ирызҿлымҳауп. Аԥсуаа ҳаиԥш, абаскцәа хадаратәла иашьҭоуп ркультуреи рбызшәеи реиқәырхара. Урҭ акыр акаҳарақәеи ахаларақәеи ԥыршәахьеит.
"Абаскцәа ахьыԥшымра рцәыӡит 1937 шықәса рзы. Иара убас, Франко ихаан акыр агәаҟрақәа рхыргеит, рбызшәа шьаҭанкыла ақәхра аамҭа иҭагылан. Егьа уадаҩра рхыргазаргьы, абаскцәа ирылдыршеит ркультура, рбызшәа аиқәырхара. Иахьа, абызшәа аҿиара иазку апроектқәа аус рыдырулоит. Аԥсны ишҳамоу еиԥш, уаҟа аус руеит абызшәа аинститут, акультуреи абызшәеи рыҿиаразы ахеилакқәа", — иҳәеит Ӷәынџьиа.
Абаскцәа Аԥсынтәыла ашҟа ирымоу ахьыԥшымра азҵаарақәа ахадаратә ҭыԥ ааныркылаӡом, дара еиҳарак изызҿлымҳау ҳкультура аҿиара иадҳәалоу аҭҵааратә усқәа роуп.
"Аԥхьаҟа иазгәаҭазар бзиоуп Аԥсныи абаскцәа ртәылеи рыбжьара ауаажәларра-ҭҵааратә еимадаракәа ирызку апроектқәа. Иазгәасҭарц сҭахуп, "Не посольство Абхазии" даара ихҭыс дуны ишыҟалаз Сан Себастиан акультуратә ԥсҭазаараҿы", — ҳәа азгәеиҭоит Мақсим Ӷәынџьиа.
Испаниа имҩаԥысуаз аусуратә еиԥыларақәа рнаҩс, Мақсим Ӷәынџьа апресс-конференциа мҩаԥигеит ажурналистцәеи ауаажәларратә хаҭарнакцәеи рзы.
