АҞӘА, ԥхынгәы 25 – Sputnik, Асида Кәыҵниаԥҳа. XVI агәыҳалалратә амузыкатә фестиваль "Хьыбла Гьерзмааԥҳа шәаалыԥхьоит…" ахь абилеҭқәа рыҭира хацыркхоит ԥхынгәы 26 рзы Аԥсуа драматә театр акассақәа рҿы. Абри атәы аанацҳауеит Аԥсны Акультура аминистрра апресс-маҵзура.
Сынтәатәи афестиваль иалахәхоит Фабио Мастранџьело напхгара зиҭо москватәи акамертә оркестри Хьыбла лысасцәа – Нхыҵ Уаԥстәыла зҽаԥсазтәыз артист Алексеи Татаринцеви Атеатр ду асолистка Агунда Кулаевеи.
"Афестиваль мышкоуп ианымҩаԥысуа. Избарц зҭаху рацәахоит азы ҳара иҳаӡбеит атеатр аԥхьа аекран ҷыда ықәҳаргыларц, ишиашоу ицо атранслиациа абаразы", — лҳәеит аминистр.
XVI амузыкатә фестиваль "Хьыбла Гьерзмааԥҳа шәаалыԥхьоит…" мҩаԥысран иҟоуп нанҳәа 6 асааҭ 20:00 рзы, Самсон Ҷанба ихьӡ зху Аԥсуа драматә театр аҿы.
Жәларбжьаратәи афестиваль "Хьыбла Гьерзмааԥҳа шәаалыԥхьоит…" еиҿкаан 2001 шықәсазы, Аԥсны имҩаԥысуан. 2014 шықәса рзы Москва, К. С. Станиславскии В. И. Немирович-Данченкои рыхьӡ зху Амузыкатә театр аҟны имҩаԥысит. 2015 шықәса рзы XIV афестиваль Вена, Музикфераин азал аҟны имҩаԥган. 2016 шықәса рзы – Швеицариа, Санкт-Мориц.
