АҞӘА, ԥхынгәы 26 – Sputnik, Роберт Џьопуа. "Иаку абилеҭ" рхы иадырхәахьеит 700-ҩык рҟынӡа Аԥсныҟа иаауа апассаџьырцәа. Цәыббра анҵәамҭанӡа 2 000 билеҭ рҟынӡа ҿаҵоуп, ҳәа радио Sputnik аинтервиу аҭо илҳәеит "Иаку атранспорттә дирекциа" апресс-маӡаныҟәгаҩ Елена Лосева.
Лара лажәақәа рыла "Иаку абилеҭ" шыманшәалоу азы ахы аанарԥшит.
Лосева иазгәалҭеит "иаку абилеҭ" ала Аԥсныҟа иаалар шалшо атуристцәа рыдагьы Аԥсны атәылауаа. Амаҵзура ҿыц алагалоуп Аԥсныҟа иаауеи Аԥснынтәи ицои апассаџьырцәа еиҳа рырманшәаларазы.
"Иаку абилеҭ" — уи билеҭк ала адәыӷба, аҳаирплан ма автобус ала аныҟәара анулшо ауп. Асеиԥш иҟоу амаҵзурақәа рхы иадырхәоит адунеи зегьы аҟны. Апассаџьыр имоуп алшара еиҳа ихазы еиӷьны иибо амаҵзура алхра.
"Адлертәи адәыӷбаангыларҭахь иааиуа апассаџьырцәа Аԥсны ақалақьқәа: Гагра, Пицунда, Аҟәа, Гәдоуҭа, Афон рахь иаауа автобусқәа рахь ииасыр алшоит. Атуристцәа зырманшәало ируакуп аҳәаа ахысраан аԥыжәарақәа рыҟазаара", — лҳәоит Лосева.
Автомобилтә транспорт ала иаауа ма ицо апассаџьыр азин имоуп ҩеижәихәба кьыла аидара аиагара.
Абилеҭ ахәԥса иартәоит: Адлер — Гагра – 550 мааҭ, Адлер — Пицунда – 700 мааҭ, Адлер — Гәдоуҭа – 850 мааҭ, Адлер – Афон Ҿыц – 1000 мааҭ, Адлер — Аҟәа – 1200 мааҭ. 5 рҟынӡа зхыҵуа ахәыҷқәа рымҩангара хәыда-ԥсадоуп.
Лосева лгәаанагарала амҩангара ахәԥса маҷк иҳаракызаргьы аилахәыра апассаџьырцәа ирыднагало аманшәалара уи иаԥсоуп.
Елена Лосева иара убасгьы иазгәалҭеит аҳәаа аушьҭырҭатә ҭыԥ аҟны ишазыԥхьагәаҭоу "Иаку абилеҭ" ала иаауа аԥсшьаҩцәа рзы ацәаҳәа ҷыда аартра. Уи иаркьаҿуеит аушьҭырҭатә ҭыԥ "Ԥсоу" ахысра аамҭа.
