АҞӘА, ԥхынгәы 28 – Sputnik. Аԥсны Апарламент адепутатцәа Левон Галустиани Алхас Џьынџьали радио Sputnik аҟны еиҭарҳәеит абри Аиқәшаҳаҭра аратификациа зуразы рыбжьыҭираан напхгаганы ирымаз.
"Ауаажәларраҟны акраамҭа иҟан аимак-аиҿак асеиԥш иҟоу аорган аԥҵатәи иаԥҵатәыму ҳәа. Уахьтәи агангьы арахьтәи агангьы рхатә гәаанагарақәа аҵаҵӷәқәа рзырыԥшаауан. Хаҭала сара аҭагылазаашьа шәаны-икапанны исыӡбеит Ацентр аԥҵаразы сыбжьы сҭиирц", — иҳәеит адепутат Галустиан.
Иара убри аан иазгәеиҭеит Апарламент ахәбатәи ааԥхьара адепутатцәа рымшала адокумент акыр аиҭакрақәа шаиуз.
Алхас Џьынџьал дақәшаҳаҭхеит Аиқәшаҳаҭра аԥсахрақәеи ариашарақәеи шалагалаз, иара убри аан иҳәеит, Ацентр аҩыза аорган Аԥсны иаԥҵамзар ада ԥсыхәа ыҟаны ишимбо.
"Сара мап скуеит, избанзар тәылауаҩык иҳасаб ала аума, депутатк иҳасаб ала аума Ацентр ыҟамзар ҟамло изыҟалаз агәра рзсмыргеит. ААР аганахь ала ҳара иара усгьы Урыстәыла аус ацаауеит. Асеиԥш иҟоу аорган аԥҵазарц азы ҳара ҳаҩныҵҟа ҳалшарақәа зегьы наҳххьазар ауп, насоуп агәыла ҳаниҳәаша", — иҳәоит Џьынџьал.
Левон Галустиан иазгәеиҭеит Аиқәшаҳаҭра ԥхьаҟа иалагалахар зылшо аԥсахрақәагьы аратификациа иахыжьхар ауп ҳәа. Апарламент агәаанагара убри аан азхьаԥшра амоур урҭ аԥсахрақәа амч рымам ҳәа иԥхьаӡатәуп.
Аԥсны аҩныҵҟатәи аусқәа рорганқәа Ринформациа-координациатә центр аусура аиҿкааразы Аԥсны Аҳәынҭқарреи Урыстәылатәи Афедерациеи рыбжьара Аиқәшаҳаҭра анапы аҵаҩын 2017 шықәса лаҵарамза 18 рзы.
