АҞӘА, ԥхынгәы 28 – Sputnik, Бадраҟ Аҩӡба. Иӡыз атурист Андреи Лихачиов иԥшаара иацҵоуп Аданга иахьаҵанакуа аҭыԥқәа рҟны, иҳәеит Аԥсны Аҭагылазаашьа ҷыдақәа рминистрра апресс-маҵзура аиҳабы Мизан Ломиа.
"Фҩык аԥшааҩцәа Адангаҟа вертолиотла инарышьҭит. Дара уа игәаҭаны иахысырц иҟоуп Аӡеиқәа, ашьхахыҵырҭа Кулиамба, Аӡгара", — иҳәеит иара.
Урыстәылатәи атурист Андреи Лихачиов гәҭакны иман ашьхатә маршрут Ԥсҳәы, Аӡеиқәа, ашьхахыҵырҭа Кулиамба, Ҵабал данысырц, нас уахьынтәи Гаграҟа дхынҳәырц.
Аҵыхәтәантәи аицәажәара рыман иани иареи ԥхынгәы 12 рзы. Ԥхынгәы 22 рзы Шәачантәи иҩныҟа дԥырраны дыҟан.
