АҞӘА, цәыббра 12– Sputnik, Сариа Кәарацхьелиаԥҳа. Афестиваль аҟны Бах, Франк, Санс, Лист уҳәа егьырҭ аклассикатә музыка ахаҭарнакцәа рырҿиамҭақәа рзыӡырыҩрра алшоит. Абри атәы Sputnik Аԥсны иазеиҭалҳәеит афестиваль аиҿкааҩ, Аԥсны жәлар рартистка Марина Шамԥҳа.
Лара лажәақәа рыла афестиваль аҟны раԥхьаӡа акәны иадырҳәараны иҟоуп уаанӡа Аԥсны иадмырҳәацыз "Пицундатәи ауарӷан азы агимн". Амузыка иҩит Аԥсны аҳәынҭқарратә хортә копелла адиректор Нодар Ҷанба.
Нодар Ҷанба ихаҭа иакәзар Шәачатәи аоркестр дирижиорра азиуеит.
"Афестиваль уникалуп. Агәахәара унаҭоит амузыкантцәа ргеографиа аҭбаара. Иара убасгьы афестиваль аҟны раԥхьаӡа акәны аԥсуа дгьыл иқәыҩуеит Франциск Пуленк иеиԥш иҟоу акомпазитор ирҿиамҭақәа", — иҳәеит иара.
Пуленк икомпозициа нанагӡоит Давид Терезиан напхгара зиҭо Аԥсуа камертә оркестр.
Раԥхьаӡа акәны Пицунда ауарӷантә фестиваль мҩаԥигеит Леонид Роизман, 1976 шықәса рзы.
2012 шықәса рзы урҭ атрадициақәа ирыцылҵеит Аԥсны жәлар рартистка Марина Шамԥҳа.
