АҞӘА, цәыббра 12 – Sputnik, Амра Амҷԥҳа. ООН Ахәыҷтәы фонд Unicef ҩышықәса инарзынаԥшуа Аԥсны аҵареи аҵарадырреи рминистрра адгыларала ареспублика ашколқәа рырҵаҩцәа рзы атренингқәа мҩаԥнагоит. Уажәы Unicef Аԥснытәи ашколқәа 120 аҳамҭақәа рзыҟанаҵеит. Ҳамҭас ирнаҭаз аклассӷәқәеи амаркерқәеи ҩымчыбжьа рыҩныҵҟа ашколқәа рахь инаргоит.
"Ашколқәа зегьы фба-фба классӷәы роуеит. Урҭ ирыцуп излаҩуа амаркерқәа. Дара аҵарашықәс нҵәаанӡа ирызхароуп. Арҭ амаҭәарқәа арҵаҩцәа ирыцхраауеит русураҟны", — иҳәеит Русҭам Аншба, ООН ахәыҷтәы фонд Unicef аусзуҩ.
Актәи акциа мҩаԥган ааигәа аремонт ззыруз, Иури Воронов ихьӡ зху ашкол аҟны.
Ашкол 11 акласс аҵаҩы Аелита Арутиуниан арҭ аклассӷәқәа анылба илҳәеит ашкол азы даара ишмаҭәахә бзиоу.
Русҭам Аншба, ООН ахәыҷтәы фонд Unicef аусзуҩ иазгәеиҭеит Unicef ишазыԥхьагәанаҭоу ашколқәа ԥхьаҟагьы реиқәыршәара.
"Аҵарашықәс анҵәамҭазы Аԥснытәи ашколқәа атехникатә еидкылақәеи 3D мыругақәеи рызнаагоит" — иҳәеит иара.
ООН ахәыҷтәы фонд Unicef сынтәа, лаҵарамзазы Аԥснытәи ашколқәа рахь инанашьҭит ахсаалақәа, аглобусқәа, химиеи физикеи, географиеи биологиеи, анатомиеи англыз бызшәеи рзы атаблицақәа.
