АҞӘА, цәыббра 18 – Sputnik. Аимак ҭынчымҩала иҭышәныртәалатәуп, агрессиа аҭак аҭахоит иҳәеит Ермантәыла Адәныҟатәи аусқәа рминистр афбатәи афорум "Армения-Диаспора" аҟны дықәгыло. Абри атәы аанацҳауеит Sputnik Армения.
"Аибашьра иалагар, уи аанкылашьа шамоуа убарҭахар Ермантәыла Ашьха Ҟарабах азханаҵоит. Уи иаанаго аиҿцәажәарақәа аанкылахоит ҳәа ауп", — иҳәеит аминистр.
Иара убри аан иара иазгәеиҭеит зхаҵарала мацара апроблема аҭыԥ ишузықәымҵо. Аиҿцәажәарақәа ирылшоит азҵаара ҭынчымҩала аҭыԥ ақәҵара.
Аминистр иажәақәа рыла Ермантәыла изныкымкәа аҳәамҭа ҟанаҵахьан ацхантәаҩцәа ражәадгалақәа шаднакыло, Азербаиџьан урҭ мап шырцәнакуа. Еилкаауп асеиԥш аҭагылазаашьаҿ азҵаара ӡбара шамоуа.
"Аимак аҭышәныртәалара Ҟарабах аинтересқәа ирықәшәозароуп", — иҳәеит Налбандиан.
Иара иазгәеиҭеит аерман ган апроблема азнеишьа ОБСЕ Минсктәи агәыԥ азнеишьа ишақәшәо.
Афбатәи азеиԥшерманытә форум "Армения-Диаспора" мҩаԥысуеит Ереван, цәыббра 18 — 20 рзы. Афорум иалахәуп 71 тәыла рҟынтәи 1800-ҩык аҳәынҭқарратә, аполитикатә, ауаажәларратә усзуҩцәа, азеиԥшерман еилазаарақәа рнапхгаҩцәа, ажурналистцәа, аҵара, акультура, адоуҳа рхаҭарнакцәа.
