АҞӘА, цәыббра 26– Sputnik, Бадри Есиава. Аԥсны 24-тәи ачемпионат 18-тәи ахыркәшаратә тур ахыркәшаратә хәмарра мҩаԥысит ашәахьа, цәыббра 25 рзы Гагра. Ашьапылампылтә клубқәа "Гагреи" "Афони" ашәахьаҽынтәи реиндаҭлараан еиҭахеит. Уи инақәыршәаны гагратәи акоманда атурниртә таблицаҿ актәи аҭыԥ ахь иҩеиит.
Аха уи макьаназ иааирам иҳәеит Аԥсны ашьапылампыл азы Афедерациа аиҳабы Џьума Кәарацхьелиа.
"Ашьапылампылтә клубқәа "Гагреи" "Афони" ашәахьаҽынтәи реиндаҭлараан еиҭахеит. Акака очко роуит. Уажәазы гагратәи акоманда иамоуп 44 очко, афонтәи – 43 очко. Аха макьаназ алкаақәа рыҟаҵара хьшәоуп избанзар афонтәи акомандеи галтәи акомандеи реицыхәмарра мҩаԥысраны иҟоуп", — иҳәеит иара.
Кәарацхьелиа иажәақәа рыла "Афон" "Самырзаҟан" иаԥнагар аочкоқәа рыла "Гагра" иаԥысуеит.
Иара иазгәеиҭеит ахәмарраан акомандақәа рыҩбагь ицәгьамкәа рхы шаадырԥшыз. Ахәмарра 1:1 ҳәа еилгеит.
Ахәмарцәа дрыхцәажәо Џьума Кәарацхьелиа даликааит акоманда "Афон" ахьчаҩбжа Владимир Аргәын.
