АҞӘА, абҵара 30– Sputnik, Бадраҟ Аҩӡба. Арҩашьыгатә маҭәашьар зыдкыланы амашьына аԥсҟы зку рыдкыланы иҟазар, шықәсыбжак амашьына аныҟәцара азин имхтәуп, иҳәеит Аԥсны Аҳәынҭавтоинспекциа аиҳабы инапынҵақәа назыгӡо Баҭал Агрба, арҩашьыгатәи, аԥсихотроптә маҭәашьарқәа изакәанымкәа реикәыршара ахылаԥшразы акомиссиа аилатәараҟны. Аилатәара мҩаԥысуан абҵара 29 рзы.
"Ҳара ажәалагала ҟаҳҵоит амашьына аԥсҟы зку анаркотикқәа рыдкыланы иҟазар 30 уахи-ҽни иҭакызарц, иара убасгьы шықәсыбжак амашьына аныҟәгара азин имхзарц", — иҳәеит иара.
Баҭал Агрба иазгәеиҭеит абарҭ амшқәа рзы Очамчыра араион аҟны ареидқәа шымҩаԥгаз.
"Жәаҩык амашьына аԥсҟы зкыз аанаҳкылеит, урҭ рахьтә аӡәы марихуана даханы дыҟан", — иҳәеит Агрба.
Аринахыс ареидтә уснагӡатәқәа инарҭбааны рымҩаԥгараан урҭ ирылахәхоит Агәабзиарахьчара аминистрра аусзуҩцәа аҭыԥ аҿы анализқәа рымҩаԥгаразы.
