АҞӘА, ԥхынҷкәын 19 – Sputnik. Амилициа алеитенант Спартак Манукиан иганахь ала ихацыркуп ашьаус, арыжәтә ыжәны аԥсҟы акразы. Манукиан иҭагылазаашьа иахҟьеит ауаҩԥсы иԥсра. Абри атәы аанацҳауеит Аԥсны Аҩныҵҟатәи аусқәа рминистрра аофициалтә саит.
Аҩныҵҟатәи аусқәа рминистрра адыррақәа рыла ԥхынҷкәын 17, асааҭ 20.15 рзы Ӡиӡариа ихьӡ зху амҩаҿы арыжәтә ыжәны иҟаз, амилициа алеитенант еиҵбы Спартак Манукиан зыԥсҟы икыз автомашьына "Митсубиси" аихамҩатә дәыӷбаангыларҭахь ахы рханы дцон.
"Амҩан, амҩатә ԥҟарақәа еилаганы, ишиашоу ицо ацәаҳәа еихҵәаны иаԥхьаҟа иааиуаз автомашьына "Хонда-Стрим" дажәлеит. Автомашьына иҭан: Џьениа А.И., Кәарҷиа А., Кәарҷиа Х., Кәарҷиа Ҳ., Габуниа Е., Зарандиа-Габуниа. Кәарҷиа Ҳаџьараҭ Индико-иԥа иоуз аахақәа ирыхҟьаны иԥсҭазаара далҵит, егьырҭ апассаџьырцәа ареспубликатә хәышәтәырҭа иҭоуп" ҳәа аанацҳауеит аусбарҭа асаит.
Автомашьына "Митсубиси" аԥсҟы зкыз амедицинатә цхыраара анирҭа ашьҭахь амилициа аусзуҩцәа аамҭалатәи аанкыларҭахь днаргеит.
