АҞӘА, ԥхынҷкәын 25 – Sputnik. Аԥсны Аҭагылазаашьа ҷыдақәа рминистр Лев Кәыҵниа иҽалаирхәит Урыстәылатәи Афедерациа аиқәырхаҩ Имшныҳәа. Абри атәы аанацҳауеит АҶА апресс-маҵзура.
Аныҳәатә уснагӡатәқәа мҩаԥысит Москва, Кремльтәи Ахан аҟны.
"Есышықәса абарҭ амшқәа раан Москва аныҳәатә уснагӡатәқәа рылахәразы еизоит Урыстәыла зегьы аҟынтәи аиқәырхаҩцәа. Уахь инарыԥхьоит аҳәаанырцәтәи атәылақәа рҟынтәи рколлегацәа", — ҳәа арбоуп апресс-маҵзура адырраҭараҟны.
Урыстәылатәи АҶА аиҳабы Владимир Пучков иааишьҭыз ааԥхьаратә шәҟаҟны иазгәаҭан жәларбжьаратәи аизыҟазаашьақәеи аусеицуреи акыр хра рыманы ишыҟоу, аҭагылазаашьа ҷыдақәа раԥырҟәҟәаареи раԥыхреи рызҵаарақәа рҟны, аԥышәа аимдараҿы, амилаҭтә еиқәырхаратә маҵзурақәа рырҿиараҿы.
Лев Кәыҵниа идныҳәалараҿы акәзар, иазгәеиҭеит урыстәылатәи рколлегацәа аԥсуа маҵзура аҿиараҿы ахәшьара шыуадаҩу.
"Аусбарҭабжьаратә еиқәшаҳаҭра иҳабжьоу инақәыршәаны Аԥсны Аҭагылазаашьа ҷыдақәа рзы аминистрра атехникатә еиқәыршәара бзиа амоуп. Иара убасгьы еицымҩаԥаагоит атеориатәи апрактикатәи ҽазыҟаҵарақәа", — иҳәеит Лев Кәыҵниа.
Урыстәылатәи аиқәырхаҩ Имш аныҳәа аҳәаақәа ирҭагӡаны имҩаԥысит Лев Кәыҵниеи иколлега Владимир Пучковыи реиԥылара.
Аиԥылараан Пучков иазгәеиҭеит 2018 шықәса рзы Аԥсны аҭаара шигәҭаку.
Иара убасгьы, Лев Кәыҵниа дырԥылеит Никарагуеи Узбекисҭани рҟны Аҭагылазаашьа ҷыдақәа рминистрцәа. Лев Кәыҵниеи Рустам Джураеви алацәажәаеит аусбарҭақәа рыҩба ԥхьаҟатәи русеицура аԥеиԥш.
1995 шықәса раахыс, есышықәса, ԥхынҷкәын 27 рзы иазгәарҭоит аиқәырхаҩ Имшныҳәа.
