АҞӘА, жәабран 2 – Sputnik, Амра Амҷԥҳа. Аендоскопиа аҟәшаҿы иаадыртит иҷыдоу аҟәша. Араҟа имҩаԥырго иалагоит алапароскопиатә операциақәа, еиуеиԥшым ахырхарҭақәа: ахирургиа, агинекологиа, аторакалтә хирургиа, урологиа рыла.
Алента ҟаԥшь ԥырҟеит Аԥсны агәабзиарахьчара аминистр Ҭамаз Ҵахнакьиеи Ареспубликатә хәышәтәырҭа аҳақьым хада Аполлон Гәыргәлиеи. Аҟәша ашә аартра ианашьан аҳақьым хада ихаҭыԥуаҩ Руслан Смыр. Иара иоуп ԥхьаҟагьы аҟәша аусура хылаԥшра азҭало.
Смыр иазгәеиҭеит Аԥсны Аџьынџьтәылатә еибашьара алахәылацәа рзы иҷыдоу апалата шыҟало.
Аҟәшаҿы аус рулоит 18-ҩык: хәҩык аҳақьымцәа — ахирург-аендоскопист Руслан Смыр, аҳақьым-гинеколог Наталиа Гыцба, аҳақьым-гинеколог Гунда Гарцкиа, аторакалтә хирург Илларион Ладариа, аҳақьым-хирург Антон Нарманиа.
Sputnik акорреспондент дзыҿцәажәоз Руслан Смыр иҳәеит аҟәшазы амыругақәа шаахәаз аинвестициатә программа аҳәаақәа ирҭагӡаны.
"Уаанӡа алапароскопиатә операциақәа рымҩаԥгаразы ахирургиа аҟәша иаҵаркны иааҳартхьан. Уажәы аендоскопиатә ҟәшаҿы иааҳартит аҟәша ҷыда. Алапароскопиатә хирургиа Аԥсны ахархәара аҭахеит аибашьра анеилга ашьҭахь. Усҟан Владислав Арӡынба амыругақәа ахәышәтәырҭа иаиҭеит. 2002 шықәса рзы амыруга ҿыцқәа аахәан. Иахьазы, иуҳәар алшоит, амедицина абри ахырхарҭа алаҵәара аиуит ҳәа. Уажәшьҭа ҳара иҳамоуп алшара ҳтәылауаа абасеиԥш иҟоу аоперациақәа рзыҟаҳҵалартә. Иазгәасҭар сҭахуп адунеи зегьы аҟны алапароскапиатә хирургиа шеиԥшу. Ус анакәха Аԥсынгьы адунеи зегьы аҟны иҟарҵо аоперациақәа рыҟаҵара ҳалшоит", — иҳәеит Смыр.
Руслан Смыр иажәақәа рыла 2017 рзы имҩаԥган 165 лапароскопиатә операциа.
Агәабзиарахьчара аминистр Ҭамаз Ҵахнакьиа иазгәеиҭеит аҟәша аартра хықәкы хаданы иамоу Аԥсны ауааԥсыра аҳәаанырцәҟа имцакәа аҭыԥ аҿы аҽыхәышәтәра рылшартә аҟаҵара.
Аминистр иҳәеит 2018 шықәса рзы Ареспубликатә хәышәтәырҭаз ишазыԥхьагәаҭоу хықәкылатәи аиҳабыратә программа.
"Ахықәкытә программа аҳәаақәа ирҭагӡаны аендоскопиатә ҟәшазы аматериалқәа роура еиҿкаахоит. Ҳара ҳҳақьымцәа ачымазцәа иахәҭоу ацхыраара рырҭалартә иҟалоит ҟазара ҳаракыла. Ҳара зегьы ҳзы асеиԥштәи аҭагылазаашьа ныҳәак еиԥшуп", — иҳәеит иара.
Агәабзиарахьчара аминистр иазгәеиҭеит ахәышәтәырҭа еиҳа-еиҳа аамҭа иақәшәо аҿиара шамоу, ишаадыртуа аҟәша ҿыцқәа, адиагностика амҩаԥгареи ахәышәтәреи шеизҳауа.
"Аҵыхәтәантәи ашықәсқәа рзы иаԥҵахеит здырра ҳараку аколлектив. Аҵарақәа ҵаны иааит аҿар. Ажәытә ахирургиа аҟәшаҿы зегьы еидукылозар, уажәы ахирургиа аҟәша иамоуп ахырхарҭа ҷыдақәа: ахаҿытәи апластикатәи хирургиа, ашьа-датә хирургиа, анеирохирургиа уҳәа", — иҳәеит Ҭамаз Ҵахнакьиа.
Аҳақьым хада Аполлон Гәыргәлиа иазгәеиҭеит аус зуа шыҟоу, аус зларуа ала ишеиқәыршәоу, иаанхаз иара аусура ахаҭа шакәу.
