АҞӘА, жәабран 28 – Sputnik, Бадраҟ Аҩӡба. Алитератураҭҵааҩ, афилологиатә наукақәа рдоктор Владимир Аҵнариа иԥсы ҭазҭгьы иахьа 80 шықәса ихыҵуан.
"Владимир Аҵнариа ҳара Котик ҳәа иаҳҳәон, иара сара хаҭала еиҳа исзааигәаз, исызгәакьаз дреиуан. Иареи сареи Кәтол инаркны аҵара еицаҳҵон, уаҟа хҩык – Владимир Касланӡиа, Котик, сара еиҳа бзиа еибабоз ишьҭибахуаз ҳреиуан. Маҷ-маҷ Аҟәа ҳааит, усҟан ақырҭцәа раамҭа ыҟан, аҵарагьы мариамызт, аха иара ихшыҩ ҵарын", — иҳәеит Аԥсны Жәлар рпоет Мушьни Лашәриа.
Кәтолтәи ашкол аҟны аҵара анырҵози нахыс акырынтә Владимир Аҵнариеи Мушьни Лашәриеи ашәҟәқәа еимданы ирыԥхьон.
"Иҟоуп Анцәа ирацәаны абаҩхатәрақәа заҭәеишьо, гәыбылрала иаликаауа, Аҵнариа убас иҟаз дреиуан. Рыцҳарас иҟалаз, игәабзиара аганахь ала аԥсыҽрагьа ицишеит, аха даныҷкәыназ аамҭазы акырӡа илиршеит", — азгәеиҭеит уи.
Аԥсуа литературатә критика аҟны Владимир Аҵнариа даара аџьабаа ибеит иусура алҵшәақәагьы наунагӡа амилаҭтә литература аҭҵаара аҭоурых аҟны инхо акоуп, иҳәеит Лашәриа.
"Котик ииҳәарызеишь ҳәа ихәаԥшуан, убас иҟан ибаҩхатәра, убас иҟан идырра аҵаулара. Иара анемец бызшәа аӡеиԥш иҳәон, анемец филологиа Европа еиҳау маҷуп, урҭ рсахьажәа убриаҟара иҳаракуп", — ациҵеит Жәлар рпоет. — Икандидаттә усумҭа Баграт Шьынқәба ирҿиара аҭҵаара иазкуп, анаҩс адоктортә диссертациа аԥсуа жәеинраалеиҿартәышьа иазкуп, ари даара иуадаҩ усуп, Аҵнариа ауама илиршеит, аха зегь дара роуп акәаԥ узыргылаӡом, акәаԥ аурысқәа, анемеццәа ирызмыргылеит ажәеинрала закәу, кәама-ҵамас иаҵоу, аха ӷәӷәала иҭиҵааит".
Мушьни Лашәриа иазгәеиҭеит Владимир Аҵнариа ирҿиаратә ҭынха акырӡа шаҵанакуа аиҭаҭыжьрагьы шаҭаху.
Владимир Аҵнариа иԥсҭазаара далҵит 2006 шықәсазы.
