АҞӘА, хәажәкыра 7 – Sputnik. Хәажәкыра 18 рзы имҩаԥысраны иҟоу Урыстәыла Ахада иалхра аҽазыҟаҵара иазкыз аилацәажәара мҩаԥигеит Аԥсны Ахада Рауль Ҳаџьымба аҩаша, хәажәкыра 6 рзы. Аԥсны Ахада иазгәеиҭеит асеиԥш иҟоу ауснагӡатә аҽазыҟаҵара бзиа аҭахны ишыҟоу.
Рауль Ҳаџьымба Аԥсны араионқәеи ақалақьқәеи рнапхгара рнапы ианиҵеит абжьыҭира амш аҽны алхыҩцәа алхратә ҭыԥқәа рахь иназгаша атранспорт аусура еиҿыркаарц.
Ҷыдала азхьаԥшра аиҭеит абри амш аҽны алхырҭатә ҭыԥқәа рҿы ашәарҭадара аиҿкаара аҭахны ишыҟоу.
Аԥсны иҟоу Урыстәылатәи Афедерациа Ацҳаражәҳәаҩ Семион Григориев еиҭеиҳәеит Аԥсны иахьаҵанакуа ишаартхо алхырҭатә ҭыԥқәа 20.
Иара иҳәеит аҽазыҟаҵарақәа хаҭабзиара ҳаракыла ишымҩаԥысуа.
Аԥсны Аҩныҵҟатәи аусқәа рминистр Гарри Аршба далацәажәеит аусбарҭеи Ашәарҭадаратә маҵзуреи ишеицеиҿыркаауа ашәарҭадара аплан.
