АҞӘА, хәажәкыра 26 – Sputnik, Амра Амҷԥҳа. Аҟәа араион аԥжәара иахҟьаны иҭахаз Гәымсҭа ақыҭан инхоз 1960 шықәсазы ииз Беслан Латариа иоуп, ҳәа аанацҳауеит апрокуротура хада асаит.
Ааигәа инхо ражәақәа рыла аԥжәара ҟалеит аихамҩақәеи Аҳабла ҿыци иахьрыбжьанакыз абнараҿ ашьыжь асааҭ 9.30 рзы. Абри азы Аҩныҵҟатәи аусқәа рминистрра аҷаԥшьаратә хәҭахьы адырра ҟаҵан асааҭ 11.30 рзы.
Абри азы адырра ҳаиҭеит аԥыза-министр ихаҭыԥуаҩ Аслан Кобахьиа.
"Аҭыԥ аҿы инхо ауааԥсыра абнара иахьаҵанакуа аҵлаҿы аԥсыбаҩ рбеит. Адырра ҟарҵеит, анаҩсан уахь инеиит Аҩныҵҟатәи аусқәа рминистрра, Ашәарҭадаратә маҵзура, Аҭагылазаашьа ҷыдақәа рминистрра, апрокуратура русзуҩцәа", — иҳәеит Кобахьиа.
Аԥсыбаҩ ала ауаҩԥсы дызусҭоу шьақәургылартә иҟам. Убри азы ауааԥсыра рахь аҳәара ҟарҵеит иҟалаз збаз ӡәыр дыҟазар адырра ҟарҵарц.
Аҭыԥ аҿы аус руеит аексперт-криминалистцәа.
