АҞӘА, мшаԥы 10 – Sputnik, Бадраҟ Аҩӡба. Ареспубликатә хәыҷтәы-қәыԥштә школ №1 шьапылампылтә команда "Юный динамовец" 2010 шықәса рзы ииз ахәмарыҩцәа зҽаԥсазтәыз аспорт аҟаза, 1960 шықәса рзы Европа ачемпион Валентин Бубукин ихьӡ зху Х жәларбжьаратәи ахәыҷы-қәыԥштә турнир аҟны аиааира ргеит ҳәа Шәачантәи иааицҳаит акоманда азыҟаҵаҩ Георги Чалигаа.
Афиналтә хәмарраан еиндаҭлон аԥснытәи акомандеи шәачатәи акомандеи. Аԥснытәи аиааира ргеит 5:4 ҳәа.
"Афиналтә хәмарраан ампылқәа ҭадыршәит: Нестор Беселиа, Владислав Леиба, Даниил Џьопуа", — иҳәеит иара.
Атурнир иалахәыз ареспубликатә хәыҷы-қәыԥштә школ №1 шьапылампылтә команда "Юный динамовец" 2009 шықәса рзы ииз ахәмарыҩцәа ракәзар, ахԥатәи аҭыԥ ааныркылеит.
""ЦСКА-2" (Москва) ацыхәмарраан ҳкоманда аԥыжәара агеит 2:1 ҳәа. Сара агәахәара снаҭоит москватәи акоманда ҳахьаиааиз", — иҳәеит азыҟаҵаҩ.
2010 шықәса рзы ииз рыбжьара атурнир аҿы иреиӷьыз ҳәа далкаан Нестор Беселиа, 2009 шықәса рзы ииз рыбжьара –Артур Погосов.
Георги Чалигаа ҭабуп ҳәа ахиҳәааит атәыла Ахада Иусбарҭа акоманда ианаҭаз афинанстә цхыраара.
Ахәмаррақәа ирылахәын: Москва, Москватәи аобласт, Санкт-Петербург, Шәача, Краснодар, Аҟәа, Ростова-на-Дону, Воронеж, Бугуруслан, Грозныи, Хасавиурт, Чебоксар, Новосибирск, Ташкент.
