АҞӘА, мшаԥы 26 – Sputnik. Аминистрцәа Реилазаара ҿыц хымз рыҩныҵҟа еиҿкаахоит иҳәеит радио Sputnik аинтервиу азҭаз Аминистрцәа Реилазаара аппарат анапхгаҩы Давид Сангәлиа.
"Беслан Барцыц иԥхьатәареи Геннади Гагәылиа Аԥыза-министрс иҟаҵареи инарымаданы, Аԥсны Аҳәынҭқарра азакәан инақәыршәаны, Аминистрцәа Реилазаара зегьы ԥхьатәара ицоит. Абри ашьҭахь Аԥыза-министр иуалԥшьоуп аилазара ҿыц реиҿкаара. Уаанӡатәи аилазаара рнапынҵақәа нарыгӡоит хымз иреиҳамкәа. Иахьазы аминистрцәа зегьы "анапынҵақәа назыгӡо" истатус рымоуп", — иҳәеит иара.
Мшаҧымза 24 рзы Аҧсны Аҳәынҭқарра Ахада Рауль Ҳаџьымба инапы аҵаиҩит Аҧсны Аҳәынҭқарра Аҧыза-министр изы Аусҧҟа.
"Ихы дақәиҭтәызааит Барцыц Беслан Константин-иҧа Аҧсны Аҳәынҭқарра Аҧыза-министр имаҵураҟнытә даҽа усурҭак ахь ииасра инамаданы. Аҧсны Аҳәынҭқарра Аҧыза-министрс даҭазааит Геннади Леонид-иҧа Гагәлиа", — ҳәа аҳәон Аусԥҟаҿ.
Аҧсны Аҳәынҭқарра Аминистрцәа реилазаара анапы ианҵоуп Аҧсны Аҳәынҭқарра Аминистрцәа реилазаара ҿыц аҧҵахаанӡа анапынҵақәа рынагӡара.
Аҧсны Аҳәынҭқарра Ахәаахәҭра-Ааглыхратә Палата Ахада Гагулиа Геннадии Леонид-иҧа диит ажьырныҳәа 4, 1948 шықәса рзы Аҧснытәи АССР, Гәдоуҭа араион Лыхны ақыҭан.
1972 шықәса рзы далгеит Белоруссиатәи Аполитехникатә Институт, анџьныр-аргылаҩ изанааҭ иманы.
1972-1973шш. рзы Қырҭтәылатәи АССР Аргылара Аминистрра Гәдоуҭатәи СУМ, атрест №16 аҟны аус иуан.
1973-1974шш. рзы Қырҭтәылатәи АССР Аргылара Аминистрра Гәдоуҭатәи СУМ, атрест №16 аргылаҩцәа реиҳабы.
1971-1976шш. рзы ҚССР, Аргылара Аминистрра Гәдоуҭатәи СУМ атрест №16, еиҭаҵуа амеханизмтә еишьҭагыла №144 анџьныр хада.
1976-1977шш. рзы ҚССР, Аргылара Аминистрра Гәдоуҭатәи СУ-4 атрест №16, адгьылҭыҧ №18 аргылаҩ еиҳабы.
1977-1986шш. рзы аӡиа Риҵа азеиҧшкрыфарҭатә Комбинат адиректор ихаҭыҧуаҩ.
1986-1991шш. рзы Гәдоуҭатәи РАИПО анапхгара ахантәаҩы.
1991-1992шш. рзы Аҧсны АССР Аминистцәа Реилазаара ареспубликақәа рыбжьара адәныҟа-економикатәи еимадара Аҳәынҭқарратә Еилакы Ахантәаҩы.
1992-1995шш. рзы Аҧсны Аҳәынҭқарра Аминистрцәа Реилазаара Ахантәаҩы ихаҭыҧуаҩ, адәныҟатәи аеконимикатә еимадарақәа Реилак ахантәаҩы.
1995-1997шш. рзы Аҧсны Аҳәынҭқарра Аҧыза-министр.
2002-2002шш. Урыстәыла Афедерациа Аҳәынҭқарратә Дума адепутат ицхырааҩ.
1997-2002шш. рзы Аҧсны Аҳәынҭқарра Ахәаахәҭра-Ааглыхратә Палата Ахада.
2003-2004шш. рзы Аҧсны Аҳәынҭқарра Аҧыза-министр.
2002-2003шш. рзы Аҧсны Аҳәанҭқарра Ахада Ихадара Анапхгаҩы.
2004 шықәса иахьа уажәраанӡа Аҧсны Аҳәынҭқарра Ахәаахәҭра-Ааглыхратә Палата Ахада.
