АҞӘА, лаҵара 4 – Sputnik, Бадри Есиава. Аԥсны Жәлар Реизара адепутатцәа АИХ азы азакәан апроект арҽеирақәа рыдрымкылеит.
"Иахьатәи аамҭазы ателерадиоеилахәыра аусхк аҟны азин ҷыда ҟазҵои иҭазыҩуеи органы иҟоуп Аиустициа аминистрра. Аха, 2014 шықәса рзы ирыдкылан "Аимадараз" азакәан. Уи инақәыршәаны аимадара аусхк аҟны, ҷыдала ателерадиодырраҭараҿы, аҳәынҭқарратә политика аус адызулои иназыгӡои зинмчратә органы иҟоу аимадареи амассатә коммуникациақәеи Русбарҭоуп", — иҳәеит Апарламент аҟны Аԥсны Ахада ихаҭарнак Дмитри Шамба.
Азакәан аҿы ариашара аҭахны иҟоуп абри аганахь ала иҳәеит Шамба, иара убри аан аҳәара ҟаиҵеит азакәан апроект аҵыхәтәантәи ахәҭаҷ аус адымулакәа ирыдрымкыларц азы.
Адепутатцәа азҵаара рызцәырҵит абри аорган асеиԥш иҟоу азинмчрақәа рымҩаԥгара азынанагӡо иазынанамыгӡо азы.
Жәлар Реизара адепутат Левон Галустиан аҭагылазаашьа оумашәа иубартә иҟоуп иҳәеит. Иазгәеиҭеит Аиустициа аминистрра акадыртәи атехникатәи ҭагылазаашьа шамам араионтә телехәаԥшратә студиақәа русура ахаҭабзиара агәаҭаразы ҳәа.
"АИХқәа иурист хаҿык иҳасаб ала Аиустициа аминистрраҿы иҭарыҩуеит. Аҳәынҭусбарҭеи аминистрреи еивагыланы аус еицырулароуп", — иҳәеит Галустиан.
Агәаанагарақәа рҽеиҩыршеит. 12-ҩык адепутатцәа аԥсахрақәа ралагалара иадгылеит, 15-ҩык мап ацәыркит.
