АҞӘА, лаҵара 7 – Sputnik. Жәларбжьаратәи анаука-практикатә конференциа теманы иамоуп "Современные проблемы психолого-педагогического и социального сопровождения детей с ограниченными возможностями здоровья в международном образовательном пространстве". Аконференциа аусура хнартуеит лаҵара 7 рзы лҳәеит радио Sputnik аинтервиу азҭаз, ААУ абиолого-географиатә факультет адекан ихаҭыԥуаҩ Ельза Аиба.
"Ԥшьышықәса ирықәуп ҳауниверситетқәа рыбжьара аусеицуразы анапы зҵаҩыз аиқәшаҳаҭра аус ауеижьҭеи. Абри аамҭа иалагӡаны изныкымкәа имҩаԥаагахьеит анаука-практикатә конференциақәа, ҳастудентцәа аԥышәеимдаразы Екатеринбург иаҭаахьеит", —лҳәеит лара.
Аиқәшаҳаҭра аҳәаақәа ирҭагӡаны ҳарҵаҩцәа ирымоуп алшара Екатеринбург рҟазара иацырҵарц ҳәа азгәалҭеит Аиба.
Уралтәи арҵаҩратә университет ҩышықәса ирықәуп Аҟәатәи ацхыраагӡатә школ иахылаԥшуеижьҭеи.
"Уралтәи ҳколлегацәа иаҳзааргеит алитература рацәаны ҳамҭас", — ҳәа лҳәоит адекан ихаҭыԥуаҩ.
Аконференциа аатуеит лаҵара 7 рзы, аԥсшьарҭатә Ҩны "Солнечный" (Цандрыԥшь) аҿы.
