АҞӘА, лаҵара 30 – Sputnik, Бадраҟ Аҩӡба. Атурнир иалахәыз Аԥснытәи аспортсменцәа актәи аҭыԥқәа жәеиза ааныркылеит. Абри атәы Sputnik иазеиҭеиҳәеит Аԥсны абокс азы Афедерациа апрезидент Алик Карди оглы.
Ахьтәы медалқәа реиԥш аспортсменцәа иргеит аразны медалқәа фбеи аџьаз иалху медалки иҳәеит иара.
"Атурнир ҳара ҳзы акыр қәҿиарала имҩаԥысит. Ҩ-командакны ҳақәгылан. Атурнир алахәылацәа акыр ирацәан", — иҳәеит Алик Карди оглы.
Аԥсны апрофессионалтә бокс азы Афедерациа апрезидент Алик Карди оглы иара убасгьы иазгәеиҭеит атурнир аиҿкаара бзиа шамаз, иҳәеит аԥснытәи аспортсменцәа ҿарацәа есышықәса иара ишалахәхало, аԥхьахәқәагьы маҷымкәа аҩныҟа ишааргахьо.
Асовет Еидгыла афырхаҵа Мартирос Нагулиан игәалашәара иазкыз абокс азы жәларбжьаратәи атурнир мҩаԥысуан Адлер, лаҵара 23-30 рзы. Атурнир иалахәын 250 инареиҳаны спортсмен қәыԥш.
