АҞӘА, рашәара 1 – Sputnik. Лаҵара 24 рзы иҟалаз авариа ашьҭахь ЕгрыГЕС аҟны аремонттә усурақәа мҩаԥысуан хәымш рыҩныҵҟа. Уажәы ЕгрыГЕС уаанӡеиԥш аусура еиҭахацнаркит ҳәа аанацҳауеит АУН "Амшынеиқәафымцамч".
"Абарҭ амшқәа рзы Аԥсны фымцалашарала аиқәыршәара мҩаԥыргон ГЕС – 1; ВЛ —220 кВ "Псоу"(Салхино) ", — ҳәа аҳәоит АУН "Амшынеиқәафымцамч" апресс-маҵзура адырраҭара.
Авариа ахьыҟалаз, агидроагрегатқәа еидызҳәало адеривациатә тоннель аҟны аҵыхәтәантәи аусурақәа мҩаԥган 2006 шықәса рзы. Анормативқәа ирықәыршәаны аусурақәа ес-хәышықәса имҩаԥгалатәуп. Иахьазы имҩаԥырго амониторинг алкаақәа инақәыршәаны 2018 шықәса рзы атоннель аҟны аремонттә усурақәа ирылагоит.
ЕгрыГЕС аусура хацыркхеит 1978 шықәса рзы. Агидроагрегатқәа Аԥсны аҵакырадгьыл аҟны иҟоуп, аӡеизакырҭа – Қырҭтәыла аҵакырадгьыл аҟны иҟоуп. ГЕС амчхара 1300 мегаватт инаӡоит.
