АҞӘА, рашәара 14 – Sputnik, Бадраҟ Аҩӡба. Аԥсны Ахада Рауль Ҳаџьымба Адунеи ачемпионат FIFA-2018 аартра далахәхоит иара аиҿкааҩцәа рааԥхьарала ҳәа Sputnik иазаалыцҳаит Аԥсны Ахада ипресс-маӡаныҟәгаҩ Наала Аҩӡыԥҳа.
Ашьапылампыл азы адунеи ачемпионат аартра иалахәхоит Ливан Ахада Саад Харири, Молдова Ахада Игорь Додон, Панама Ахада Хуан Карлос Варела, Парагваи Ахада Марио Абдо Бенитес, Руанда Ахада Поль Кагаме, Саудтәи Аравиа апринц Сальман Аль Сауд, Таджикистан Ахада Емомали Рахмон, Узбекистан Ахада Шавкат Мирзиеев, Аахыҵ Уаԥстәыла Ахада Анатоли Бибилов.
Ачемпионат аартхоит астадион "Лужники" аҿы, асааҭ 17:30 рзы. Аартра ашоу иалахәхоит адунеи еицырдыруа ашәаҳәаҩцәа, ахәмарыҩцәа.
Ашьапылампыл азы адунеи ачемпионат мҩаԥысраны иҟоуп Урыстәыла, рашәара 14 инаркны ԥхынгәы 15 рҟынӡа. Ахәмаррақәа мҩаԥысраны иҟоуп ақалақьқәа: Москва, Калининград, Санкт-Петербург, Волгоград, Казань, Новгород, Самара, Саранск, Ростов-на-Дону, Екатеринбург, Шәача рҟны.
