АҞӘА, рашәара 21– Sputnik. Женеватәи аиҿцәажәарақәа алҵшәа роурц азы Қырҭтәыла Аԥсни Аахыҵ Уаԥстәылеи ишиашоу ҳаҭырқәҵарала рыҿцәажәара мҩаԥнагароуп апропагандатә акциақәа мап рыцәкны ҳәа аҳәамҭа ҟанаҵеит Урыстәыла Адәныҟатәи аусқәа рминистрра.
"Ҳара абасеиԥш иҟаҳҵаз ааԥхьара ақырҭуа ган ишахәҭаз еиԥш иаднамкылеит. Аиҿцәажәаратә процесс аан ишырҳәац еиԥш еиҭарҳәон "Аԥсни Аахыҵ Уаԥстәылеи рҵакырадгьылқәа аоккупациа рызууп ҳәа". Уи адагьы рҽазыршәон Қырҭтәыла атәылауаа А. Татунашвили, Г. Отхозориа, Д. Башарули рҭахара аполитикатә цәа ахаҵара. Абри аганахь ала аимак-аиҿак акыр ацәаныррақәа аҵаны имҩаԥысуан", — ҳәа аҳәоит асаит аҿы.
Аиҿцәажәара алахәылацәа, Қырҭтәыла ахаҭарнакцәа аалхны, иазгәарҭеит аҳәаа иаԥну аҭыԥқәа рҿы аҭагылазаашьа ҭышәынтәаланы хылаԥшра азууа иҟоуп ҳәа.
Урыстәыла Адәныҟатәи аусқәа рминистрра азхьаԥшра ҷыда анаҭеит Қырҭтәыла цасҳәа арҭ ареспубликақәа рыҩба рҳәынҭқарратә ҳәааи рымчратә органқәеи рахь аҳаҭырдара шаанарԥшуа.
"Аԥсны Аҳәынҭқарреи Аахыҵ Уаԥстәыла Ареспубликеи рхаҭарнакцәа аҳәамҭа ҟарҵеит асеиԥш аҭагылазаашьа шрызрыдымкыло азы", — ҳәа арбоуп аофициалтә саит адырраҭараҿы.
Атекст аҿы иара убасгьы иазгәаҭоуп амч ахамырхәаразы аицҳәамҭа аҟаҵара еиҭашзалмыршахаз.
"Ақырҭуа ган иузудымкыло америкатәи авариант аус адулара иацҵатәуп ҳәа иқәгылеит. Уи авариант инақәыршәаны аԥсуааи ауаԥсааи адокумент аҳәаақәа ирҭыгоуп. Урыстәыла, Аԥсны, Аахыҵ Уаԥстәыла рхаҭарнакцәа иазгәарҭеит арегион аҿы НАТО аҟазаара агәҭынчымра шрызцәырнаго, уи арегион ашәарҭадара шыҵнашәаауа. Иазгәаҭан Москва, Аҟәа, Цхинвал абри аганахь ала аҭактә уснагӡатәқәа рыдыркылар азин шрымоу", — ҳәа аҳәоит аҳәамҭаҿы.
Женеватәи аиҿцәажәарақәа ирылахәуп Аԥсны Аҳәынҭқарреи, Қырҭтәылеи, Аахыҵ Уаԥстәылеи, Урыстәылеи, Еиду Америкатәи Аштатқәеи рхаҭарнакцәа, ООН, ОБСЕ, ЕС рхаҭарнакцәа реицхантәаҩлара.
Урыстәылатәи аделегациа напхгара аиҭон Урыстәыла Адәныҟатәи аусқәа рминистрра астатс-маӡаныҟәгаҩ, аминистр ихаҭыԥуаҩ Григори Карасин.
Изаамҭанытәиу Женеватәи аиҿцәажәарақәа мҩаԥысраны иҟоуп 2018 шықәса жьҭаарамзазы.
