Ҳазҭоу амза алагамҭазы Аҟәа амшын аԥшаҳәаҿы аҽны шьыбжьон иҟалаз ақәылара ҳцәа ҳааҭанарӡыӡеит. Ацәгьоурақәа еснагь ҳгәы иасуеит, аха ахаа-мыхаақәа ахьырҭиуа адәқьан №6 иақәланы, аԥшәма ишакәым иахьизныҟәаз зтәылазы згәы былуа зегь ааиланарҩынтит.
Ус ауп еснагь ҳшазыҟоу зыԥсадгьыл иазыхынҳәыз ҳџьынџьуаа иакәымк ианақәшәалак. Ҳдемографиа аҭагылазаашьа ҳаԥшны иаҳҳәозар, адунеи иалаԥсоу аԥсуаа Аԥсныҟа рыгьежьра зда хәшәы ҳамам акоуп. Арҳәрақәеи ақәыларақәеи еснагь ҳрықәыӡбоит, аха ҳџьынџьуаа рхала абра абизнес еиҿкааны, абиуџьетгьы иахәо, даргьы ҳаԥсҭазаара рҽаларыӡҩо ианыҟоу, ари аҩыза ахҭыс акыр ақәыӡбара зҭаху акәны иҟоуп.
Ариабжьарак ажәлар злацәажәо ақәылаҩцәа рхымҩаԥгашьа хәымга аҟазшьақәа роуп. Ақәыларагьы ԥҟарак амазшәа ҳаҟан, аха адәқьан №6 ианақәлозтәи авидео зыла иабаз игәеимҭарц залшом, намыс жәла змам ззырҳәо ҳдунеи ишану. Сахәаԥшит схаҭагьы игәаӷьуацәоу авидео нҵамҭа. Быжьҩык рҟынӡа ақәылаҩцәа асабрадагьы рҿамкәа аӡәы акҿаҩра дыкҿагәаны исуеит, руаӡәы итапанча нархаҩархо акгьы дацәымшәакәа адәқьан аҩныҵҟа днеиааиуеит. Абарҭқәа азмырхакәа руаӡәы, иқәгылаз ахаа-мыхаақәа ихы иакәырхшаны ирууааӡа иршәуеит.
Абри зегь мҩаԥысуеит аҽнышьыбжьон асааҭ 4 рзы Амҳаџьырқәа рымҩаду аҿы. Ари амшын иаҿықәу амҩаду анкьа ақырҭуа шәҟыҩҩы Ш. Русҭавели ихьӡ ахын, уи ԥсахны уажәтәи ахьӡ аҭаразы амилаҭҭә-хақәиҭратә қәԥара ахаҭарнакцәа акыр аџьабаа рбеит, избанзар, асовет аамҭазы ақырҭуа политика уи иаҿагылон. Аибашьра ҳанаиааи ҳаззықәԥоз ҳҳашҭызшәа, амҳаџьырқәа рыхьӡ зху амҩаду аҿы, зыԥсадгьыл иазыхынҳәыз анаплакҩы абџьар шьтыхны иқәлара згәаӷьыз ҟалеит. Абарҭқәа иаҳдырбоит аморалтә кодексқәа ркаҳара.
Амчратә усбарҭақәа рҟынтәи иҳаҳауеит ари аус азы иаанкылоу ыҟуп ҳәа, ҳгәыӷларгьы ҳҭахуп ацәгьоуцәа ахьырхәра роуп ҳәа. Ас еиԥш иҟоу ԥҟара змам ацәгьоура ахьырхәра ацымлар, иахьеи уахеи рыԥсадгьыл иазыхынҳәып ҳәа ҳаззыԥшу ҳџьынџьуаа арахь аара ргәы ахымлар алшоит. Ус акәзаргьы, ари ахҭыс мацаразы агәкажьра аҭахым, арҳәрақәеи ацәгьоурақәеи егьарааны иҟалашт, аус злоу Аԥсны ҳара ишҳаԥсадгьылу дырны, абзиаҿгьы, ацәгьаҿгьы аидгылара аарԥштәуп.
Сгәы иаанагоит, дук мырҵыкәа адәқьан №6 иақәлаз азусҭцәоу ҳдырҳап ҳәа, насгьы урҭ рус аӡбара абырҵкал икылхны иазнеип ҳәа. Ус ианыҟамла, ацәгьоура џьбара даҽаџьара ахы ыҵнахыр алшоит.
