АҞӘА, нанҳәа 24 – Sputnik. Аԥснытәи аделегациа арра-техникатә форум "Армия 2018" иалахәхоит, афорум мҩаԥгахоит Москва амҵантәи Кубинкаҿы ҳәа ааицҳаит Sputnik акорреспондент Алексеи Стефанов.
"Ҳделегациа даара ибзианы ирыдыркылеит. Ар равиациа аусушьа ҳдырбеит, иаҳдырбеит авертолиотқәа "Ка 52", асистема "Солнцепек". Џьара ак аахәара макьаназ иазыԥхьагәаҳҭом аха Урыстәыла арратә комплекс иара ахаҭа адагьы аҩыза-ҳәынҭқаррақәагьы ршәарҭадара ахьчартә иҟоуп", — иҳәеит Sputnik акорреспондент дзыҿцәажәоз Аԥсны арратә мчрақәа рыштаб хада аиҳабы Васили Луниов.
Москва амҵантәи апарк "Патриот" аҭагылазаашьа, аиҿкаашьа уаршанхартә иҟоуп иҳәеит иара. Аԥснытәи аделегациа уахь рнеира акәзар, даара иахәҭоу усны иԥхьаӡоит. "Иара иалнаршоит Аԥсни Урыстәылеи рырбџьар мчқәа еиҳа реинырра аҭышәныртәалара", — иҳәоит иара.
"Ҳара уа иакымкәа-иҩбамкәа аиԥыларақәа мҩаԥаагеит. Убас, Аахыҵ Уаԥстәыла Атәылахьчара аминистр ҳиҿцәажәон. Дареи ҳареи ҳаицеиқәшаҳаҭхеит еиуеиԥшым ауснагӡатәқәа еицымҩаԥаагаларц. Уи адагьы москватәи ҳколлегацәа ҳарԥылеит", — иҳәеит Васили Луниов.
Иара убасгьы аштаб хада аиҳабы акыр иџьеишьеит Шьамтәылантәи иааргаз атрофеитә бџьари аџьаԥҳани.
"Иахьатәи аибашьрақәа раан азауадқәа рҿы иҭрыжьуа абџьар еиԥш, анапылаҟаҵарақәа рылагьы еибашьуеит. Афорум аҿы активла иаарԥшын шьамтәылатәи аделегациа ацәыргақәҵақәа", — иҳәоит Васили Лунев.
"Агәахәара ҳнаҭоит ааигәа Шьамтәыла Аԥсныи Аахыҵ Уаԥстәылеи рхьыԥшымра ахьазханаҵаз. Ҳара аӡәы итәы ҳҭахым, аха ҳара иаҳтәугьы аӡәы иаҳҭом", — иҳәеит иара.
IV Жәларбжьаратәи арра-техникатә форум "Армия 2018" сынтәа иалахәхоит 80 рҟынӡа аҳәаанырцәтәи анаплакқәа, 18 тәыла рҟынтәи.
