АҞӘА, цәыббра 3 – Sputnik, Бадраҟ Аҩӡба. Иаԥсыуоу аусура даннеиуа аԥсшәа хымԥада идыруазар ауп, иҳәеит атәыла Ахада Рауль Ҳаџьымба Аҳәынҭқарратә бызшәатә политиказы аҳәынҭқарратә еилакы ахантәаҩы Баҭал Ҳагәышь даниԥылоз.
"Аԥсны Аконституциа излаҳәо ала, аԥсуа бызшәа ҳәынҭқарратәуп. Ари азҵаара аӡбара ҳаҿуижьҭеи акыршықәса ҵуеит, хымԥада, иаҭахуп ишьақәыргылаз акомитет ишахәҭоу еиԥш аус ауртә еиԥш аҟаҵара", — иҳәеит Ҳаџьымба.
Аҳәынҭқарра Ахада иазгәеиҭеит аԥсуа бызшәа ахархәара аус аҟны ауадаҩрақәа шыҟоу.
"Иумбар залшаӡом Апарламент аҟны аума, егьырҭ аусбарҭақәа рҟны аума ҳбызшәа еиҭах абжьы мго иҟалеит, абри уаҩҵас ахылаԥшра аҭатәуп, иацныҟәатәуп", — ациҵеит уи.
Аҳәынҭқарратә бызшәатә политиказы аҳәынҭқарратә еилакы ахантәаҩы Баҭал Ҳагәышь аилак имҩаԥнаго аусқәа дрылацәажәеит.
"Иҭыҵраны иҟоуп аекономикатә, азиндырратә, амедицинатә, арратә, ашкол атерминологиатә, амассатә информациатә хархәагақәа ирызку ажәарқәа, иара убас аусеилыргаратә бланкқәа реиҭагара азгәаҭоуп, уи ари ашықәс иалагӡаны", — иҳәеит Ҳагәышь.
2019 шықәсазы Аҳәынҭқарратә бызшәатә политиказы аҳәынҭқарратә еилакы хыдҵас иқәнаргылеит араионқәеи ақалақьқәеи радминистрациақәа рҟны аусеилыргара аԥсшәахь аиагара.
"Анаҩс аӡыргарақәа иҟоу, адҩыларақәа, адәқьанқәа рыхьыӡқәа, асасааирҭақәа рыхьыӡқәа ииашаны ианызароуп, Аԥсны ахаҿы аԥсыуазар ауп. Иахьа иҳамоуп хҩык-хҩык Гәдоуҭеи Гагреи, егьырҭ араионқәа рҟны ҩба-ҩба штат, маҷк иацаҳҵеит избанзар Аҟәа ҳтәаны абызшәа арҿиара цәгьоуп", — иҳәеит Ҳагәышь.
Араионқәа рҟны аусура иалагаз иахьазы ауалафахәы роуӡом, аха иааиуа ашықәс инаркны ироуа аҟаҵаразы аҳәара ҟаиҵеит Ҳагәышь, уи атәыла Ахада дақәшаҳаҭхеит.
