АҞӘА, цәыббра 5– Sputnik, Бадраҟ Аҩӡба. Аиԥылараҿы Ельвира Арсалиаԥҳа илҳәеит Аԥсны имҩаԥысраны иҟоу Ингәыштәыла Амшқәа раан еиуеиԥшым ауснагӡатәқәа шымҩаԥгахо.
"Имҩаԥысраны иҟоуп ацәыргақәҵақәа, аконцертқәа, амастер-классқәа. Иахьатәи ҳаиԥылара азкуп хара имгакәа Аԥсны имҩаԥысраны иҟоу Ингәыштәыла Амшқәа", — лҳәеит аминистр.
Арсалиаԥҳа лажәақәа рыла, аинтерес аиуеит акультурақәа рыҩба реиҿырԥшра.
"Сгәы иаанагоит шәара шәзы ҷыдала арҭ амшқәа Аԥсны иамшқәаны иҟалап ҳәа, избанзар шәазааигәаны ижәбашт ҳмузеи, ҳарҿиаратә коллективқәа, акультура аусзуҩцәа. Арҭ зегьы ҳаинырраҿы раԥхьатәи шьаҿаны избоит", — лҳәеит лара.
Ингәыштәыла акультура аминистр Марет Газдиева Ингәыштәыла Ахада Иунус-Бек Евкуров ихьӡала аԥсуа жәлар ирзеиӷьалшьеит аҭынчреи амарымажареи.
"Акультуратә проект цхыраагӡа духоит ҳажәларқәа рыбжьара акультуреиԥш аиҩызаратә еизыҟазаашьақәагьы рырҿиаразы. Иҭабуп ҳәа ахысҳәаауеит гәыкала ҳахьшәыдышәкылаз", — лҳәеит Газдиева.
Аԥсны Акультуреи аҭоурых-культуратә баҟақәа рыхьчареи рминистр Ельвира Арсалиаԥҳа лхаҭыԥуаҩ Баҭал Кобахьиа иазгәеиҭеит Аԥсныи Нхыҵ Кавказ ажәларқәеи реимадара акыр шаҵанакуа.
"Иаҳзеиԥшу рацәоуп. Ирацәоуп ҳаицызхысыз апроблемақәагьы. Сра сусура аганахьала салахәын Грозныи имҩаԥысуаз аконференциа. Уа ҳара иҭаҳҵаауан Аргунтәи аиҩхаа", — ҳәа еиҭеиҳәеит иара.
Иахьа, Аԥсны Акультуреи аҭоурых-культуратә баҟақәа рыхьчареи рминистр Ельвира Арсалиаԥҳаи Ингәыштәыла Акультура аминистр Марета Газдиевеи еиԥылеит.
Цәыббра 5 — 6 рзы Аԥсны имҩаԥысраны иҟоуп Ингәыштәыла Амшқәа.
Ауснагӡатә азырхоуп ажәларқәа рыҩба ркультуратә еинырра арҭбаара.
