АҞӘА, цәыббра 7— Sputnik. Цәыббыра 6 рзы Аиҳабырабжьаратә еиқәшаҳаҭра аекономикатә усеицурази ахәаахәҭра аусхк аҟны аицхыраарази рнапы аҵарҩит Аԥсны аекономика аминистр Адгәыр Арӡынбеи Шьамтәыла аекономикеи ахәаахәҭреи рминистр Самир Халили.
Цәыббра ԥшьба рзы Рауль Ҳаџьымбеи Башар Асади рнапы зҵарҩыз аиҩызареи аусеицуреи рзы Аиқәшаҳаҭра инацҵаны анапы аҵаҩуп баџьда аилахәаахәҭразы аиқәшаҳаҭра.
Аекономика аминистр иҳәеит баџьдатәи аилахәаахәҭраз арежим аԥснытәи абизнес жәларбжьаратә аҩаӡараҿ аҿиара иацхраалоит ҳәа.
"Ҳара анаплакқәа рзы иахәҭоу аҭагылазаашьақәа аԥаҳҵароуп. Аиқәшаҳаҭра ҳәарада уи иацхраауеит", — иҳәеит Адгәыр Арӡынба.
Аекономикатә усеицура арманшәалоит аԥснытәи амшынтә баӷәазеи шьамтәылатәи амшынтә баӷәаза, Латакиеи рыбжьара хәымш рыла убжьысыр ахьалшо.
"Аԥснытәи амшынтә баӷәаза, Аҟәеи шьамтәылатәи амшынтә баӷәаза, Латакиеи рыбжьара 1400 миль роуп ибжьоу", — иҳәеит иара.
Цəыббрамза 4 рзы Аҧсны Аҳəынҭқарра Ахада Рауль Ҳаџьымба официалтə ныҟәарала Шьамтəылатəи Арабтə Республика даҭааит.
Аҧсны Аҳəынҭқарра Ахада напхгара ззиуа аделегациа аилазаараҿы иҟоуп: Аҧыза-министр Геннади Гагəылиа, Ахада Иусбарҭа анапхгаҩы Беслан Барцыц, Ашəарҭадара Ахеилак амаӡаныҟəгаҩ Муҳаммед Кьылба, Адəныҟатəи аусқəа рминистр Даур Ақаҩба, Атəылахьчара аминистр Мираб Қьышьмариа, Аекономика аминистр Адгəыр Арӡынба.
