"Актәи аиқәԥараан Даӷьысҭантәи арԥыси сареи ҳаиқәшәеит, аҩбатәи аан ақалақь Тверь ахаҭарнаки сареи ҳаиԥылеит. Хәыҷык ицәгьан, афинал аҟны анокаут ала саиааит. Тхеквандо уи абокс шьапыла ауп. Аелектронтә рбагақәа ушьапы иаҭаны уқәгылоит. Уи иуцықәгылоу иҟны уакьысыр акәатала урҭоит.
Ҳтәылаҟны аспорт иаҳа адгылара аҭахуп, иҟоуп аҷкәынцәа бзиақәа. Сахьыҟаз Даӷьысҭан ахәыҷы инаиркны аду иҟынӡа ирҭахызар амалаҳәа аспорт уадақәа рҿы рҽазыҟарҵоит. Ҳара ҳҟны уи аганахьала ауадаҩрақәа ыҟоуп. Сара аҽазыҟаҵарақәа сырҿуп Шәача. Уажәы Урыстәыла ачемпионат аҟны сахьаиааиз среитинг шьҭыҵуеит. Ус иҟан адунеи ачемпионат аҟынгьы аиааира анызгаз. Иахьазы сыкапан аҟны аспортсменцәа рыбжьара актәи аҭыԥ ааныскылоит. Анцәа иҳәар, аԥсуа бираҟ аолимпиада аҟны ишьҭаҳхуа иҟалоит, саԥсыуоуп, сыԥсадгьыл ахьӡ ашьҭыхра сашьҭоуп", — ҳәа азгәеиҭеит Ҵәыџьба.
