АҞӘА, жьҭаара 25 — Sputnik. Аилахәыра Blue Star илегендахаз аӷба "Титаник" аҩызаҵәҟьа аргылара агәҭакуп. Иара аӡы ихырҵараны иҟоуп 2022 шықәса рзы. Абри атәы аанацҳауеит РИА Новости Evening Standard адыррақәа ҵаҵӷәыс иганы.
Китаи зыргылара иаҿу аӷба аура 269 метра инаӡоит, аҭбаара – 28 метра. Аҩныҵҟатәи аиҿкаашьагьы ажәытә "Титаник" ахаҭа-ԥсаҭа акәхоит.
"Титаник II" иамоуп алшара 2400-ҩык апассаџьырцәеи 900-ҩык аекипаж алахәылацәеи адкылара, аоригинал аиԥшҵәҟьа. Аха Blue Star ахаҭарнак иҳәоит уажәазы аӷбаҿ иҟалоит иазхоны иԥхьаӡоу аԥсеиқәырхага шхәақәа.
Иазыԥхьагәаҭоуп аӷба аԥхьа Дубаинтәи Саутгемптонҟа анеира, насоуп уаанӡатәи амаршрут иақәыршәаны Британиантәи Ниу-Иоркҟа амҩа ианықәло.
