АҞӘА, ԥхынҷкәын 13 – Sputnik, Сариа Кәарцхьиаԥҳа. Гәдоуҭа ашықәс ҿыц азгәаҭара сынтәа маӡак аҵаҵәахуп ҳәа Sputnik акорреспондент илзеиҭалҳәеит ақалақь Ахадара адизаинер Кристина Гәымԥҳа.
Аԥсаӡ ҳәа сынтәа идыргыло ҿыцуп. 12-метра иҟоуп. Иара уаанӡеиԥш иқәдыргылоит Ленин иашҭаҿ.
"Аԥсаӡ ҵыԥх еиԥш еиҿкаахоит, аха ҳара иҳагәҭакуп аҿыцрагьы. Уи макьаназ иҳарзом. Аԥсаӡ ахьҳаргыло акәша-мыкәшагьы фымцатә цәашьыла ихҳаркуеит", — ҳәа лҳәоит Кристина Гәымԥҳа.
Гәдоуҭа Ашықәс ҿыц аԥылара хацдыркуеит ԥхынҷкәын 28 рзы, Ленин ишҭаҿ ахәыҷқәа рықәгыларала.
"Ԥхынҷкәын 28 асааҭ 14:00 рзы апарк аҿы ахәыҷқәа рықәгылара мҩаԥысуеит. Имҩаԥгахоит ахәмаррақәа, аицлабрақәа. Ԥхынҷкәын 29, асааҭ 16:00 рзы Акультуратә хан аҿы иазыԥхьагәаҭоуп ашәаҳәаратәи акәашаратәи ансамбльқәа рықәгылара", — ҳәа еиҭалҳәоит лара.
Ԥхынҷкәын 31 рзы аныҳәатә феиерверк мҩаԥгахоит.
