АҞӘА, ԥхынҷкәын 14 – Sputnik. 2018 шықәса инаркны Лаҭатәи арыцҳара иазку есышықәсатәи акциа Аҟәа имҩаԥгахалоит хәышықәса рахь знык ҳәа арадио Sputnik иазеиҭалҳәеит Ахьӡ-аԥша амузеи адиректор Мзиа Беиаԥҳа.
Акциа аҳҭнықалақь аҿы хынтәуп имҩаԥыргоижьҭеи. Акциа алахәылацәа ашәҭшьыҵәрақәа шьҭарҵоит Ахьӡ-аԥша апарк аҿы, иадыркуеит ацәашьқәа, ажәҩан иаларҵоит апышҭа шкәакәақәа.
"Ҳара ари арыцҳара ахаршҭра азин ҳамам. Игыло абиԥарақәа еимдо ирҳәалароуп уи аҭоурых. Аха ус шакәугьы, ари ахлымӡаах агәаларшәара ауадаҩра аҵоуп. Убри азы иҳаӡбеит акциа хәышықәса рахь знык имҩаԥаагаларц", — лҳәоит амузеи адиректор.
Сынтәа аиубилеитә акциа мҩаԥысуеит Аҟәа, ԥхынҷкәын 14, асааҭ 17:30 рзы Ахьӡ-аԥша амемориал аҿаԥхьа, асааҭ 16:30 рзы амузеи аҿы иаадыртуеит ацәыргақәҵа.
"Ҳара ҳаҟан авертолиот ахькаҳаз аҭыԥ аҿы, иаагеит иара аҟәырҷахақәа. Ари арыцҳаратә рыцхә згәаҿы ахәра ааннажьуа зегьы амузеи ахь шәааҳаԥхьоит", — лҳәоит Беиаԥҳа.
1992 шықәса, ԥхынҷкәын 14 рзы ақырҭуа фашистцәа Лаҭа ақыҭан иҭадырхеит урыстәылатәи арратә мчрақәа иртәыз, агуманитартә реис мҩаԥызгоз авертолиот Ми-8. Иҭахеит 85-ҩык, урҭ рҟынтәи 35-ҩык ахәыҷқәеи 8-ҩык зцәа зтәымыз аҳәсақәеи.
