Бадраҟ Аҩӡба, Sputnik.
Леон Қриа – аԥсҭазаара бзиа избо хәыҷуп. Иҩызцәа зегь реиԥш бзиа ибоит асахьаҭыхра, ахәмарра. Иареи ҳареи ҳаиқәшәеит Аҟәа апаркқәа руак аҿы. Уахьихәаԥшуа ак илоуп ҳәа узҳәом, иаабац ахәыҷы.
Леон игәамбзиара убарҭахо иалагеит жәымз анихыҵуаз. Усҟан иаалырҟьаны ишоура халеит. Иан ишоура анылзмыртәа ацхыраара лас ала ахәышәтәырҭахь дыргеит.
"Анализқәа зегь бзиан. Иҳаракыз илеикоцитқәа ракәын. Аамҭақәак ахәышәтәырҭа ҳҭан. Нас аҩныҟа ҳаурышьҭит. Жәамшҟа ааҵхьаны данеиласҳәоз игәасҭеит ихәда аганаҿ ачыра шамаз", - ҳәа еиҭалҳәоит иан Шьаризан Қриаԥҳа.
Ахәыҷы еиҭах аҳақьымцәа рахь днаргеит. Ачыра алазер ала идырԥхеит. Уи ашьҭахь еиҭах ишоура шьҭыҵуа иалагеит. Леон аоперациа изыҟаҵан, аха уи ала ипроблемақәа нымҵәеит. Аблы иоуит.
"Иаалырҟьаны ишоура халоит, артәарагьы ауам гәырда", - ҳәа лҳәоит ан.
Абарҭ зегь рыдагьы ицәажәарагь ауадаҩрақәа амоуп. Леон ихьҵәҟьоу шьақәдыргыларц изныкымкәа атәыла анҭыҵҟа дыргахьеит. Шьаризан илҳәоит аҳақьымцәа еицҿакрыла ихьуа шырзымҳәо.
"Ес-мза Краснодарҟа ҳцоит, анализқәа аҳҭоит, Шәачаҟа аневропатолог иахь ҳцоит. Иҳалшо зегьы ҳаҿуп аха макьаназ илҵшәадоуп. Ԥшьышықәса ихыҵуан леон ицәажәара шыԥкыз ангәасҭаз. Ус хшыҩла анцәа иџьшьаны иҩызцәа акала дрыҵахом. Зегь еиликаауеит", - лҳәоит Шьаризан.
Москва агәабзиарахьчара адепартамент азыхиоуп Леон идкылара. Ахәыҷы ихьуа ашьақәыргыларазы иаҭахуп 350 нызқьмааҭ аԥара.
Леон ицхыраашьас иҟоу аилкаара алшоит афонд "Ашана" асаит аҿы.
