АҞӘА, ԥхынҷкәын 27 – Sputnik, Асмаҭ Ҵәыџьԥҳа. 2018 шықәса рзы Аԥсны акурортқәеи атуризми рзы аминистрра ашәҟәы иҭанагалеит атуристцәа рыдкыларҭа аобиектқәа 426 ҳәа арадио Sputnik иазеиҭеиҳәеит Аԥсны акурортқәеи атуризми рзы аминистр Авҭандил Гарцкьиа.
Иарбоу аобиектқәа иааидкыланы 25 000 шьҭаларҭа ҭыԥ рымоуп. Аминистр иажәақәа рыла, Аԥсны атуристтә обиектқәа рхыԥхьаӡара есышықәса иазҳауеит.
"Атәыла ауааԥсыра жәпаҩык атуристтә обиектқәа рыргыларазы адгьыл ргоит. Иҳамоу адыррақәа рыла, 2-3 шықәса рыҩныҵҟа 50-60 обиект рҟынӡа ргылахароуп. Уи шьахәуп, избанзар арҭ аобиектқәа иаарыкәыршаны аҽа инфраструктуракгьы ҿиароуп", — иҳәеит иара.
Аԥсны акурортқәеи атуризми рзы аминистр идыррала, Аԥсны атуристтә маршрутқәа рхыԥхьаӡара есышықәса иазҳауеит.
Гарцкьиа иажәақәа рыла, анаплакыҩцәа аҳәынҭқаррахь есышықәса аҳәара ҟарҵоит атуристтә маршрут ҿыцқәа раартразы. Аминистрра иауалԥшьоу — урҭ амаршрутқәа ршәарҭадареи ԥхьаҟа анаплакыҩцәеи дареи русеицуреи рымҩаԥгароуп.
