АҞӘА, ԥхынҷкәын 27 – Sputnik, Бадраҟ Аҩӡба. Аԥсны Ашықәс ҿыц ауха асы ҳазыԥшӡам лҳәеит Аԥсны аекологиеи аԥсабарахьчареи рзы аилак аҳауагәаҭаҩ хада Лариса Ахԥҳа.
"Ԥхынҷкәын 27, 28 рзы ареспубликаҿ ақәеи аси еиланы илеир алшоит, аха асы ауам. Асы леир ахьалшо ашьхара иахьаԥну аҭыԥқәа рҿоуп", — лҳәоит лара.
Ари зыхҟьо амшын макьаназ иахьыԥхоу ауп.
"Аныҳәа ауха асы аур зегьы ирҭахуп, аха усеиԥш егьҟалом", — ҳәа лҳәоит аҳауагәаҭаҩ.
Аныҳәа аламҭалаз аҳауа еиҳагьы иԥхаррахоит уажә аасҭа.
"Аԥхарра ладантәи иаауеит. Ахьҭа еснагь ҩадантәи ауп ареспублика аҵакыра шыхнаҩо, аха ҳашьхақәа ҳрыхьчоит", — ҳәа азгәалҭеит Ахԥҳа.
Абасала аныҳәамшқәа анашана аҟәырҷаха рыгуп, аха аныҳәа ныҳәоуп, зегь аргәырӷьоит.
