АҞӘА, ажьырныҳәа 8 — Sputnik. Аԥсны ахада Рауль Ҳаџьымба усуратә ныҟәарала Венесуела даҭаауеит ҳәа аанацҳауеит ахада ифициалтә саит.
Аҭаара ҩымш ирылагӡаны имҩаԥысуеит, ажьырныҳәа 10-11 рзы. Иазгәаҭоуп иара убас, Аԥсны ахада ихы шалаирхәуа Венесуела ахада иинаугурациа ацеремониа. Уи адагьы аҭаара аҳәаақәа ирҭагӡаны аҩ-тәылак рхадацәа реиҿцәажәара азԥхьагәаҭоуп, иалацәажәараны иҟоуп Аԥсныи Венесуелеи реизыҟазаашьақәа иахьатәи рҭагылазаашьеи ԥхьаҟатәи рыҿиашьеи ирыдҳәалоу азҵаарақәа.
Николас Мадуро Венесуела ахадас деиҭалхын 2018 шықәса, лаҵара 20 рзы. Атәыла Ацентртә алхратә комиссиа адыррақәа рыла, Мадуро иоуит 68% алхыҩцәа рыбжьқәа.
Венесуела Аԥсныи Аахыҵ Уаԥстәылеи рхьыԥшымра азханаҵеит 2009 шықәса, цәыббра 10 рзы. Абас ала, Венесуела ахԥатәи тәылахеит ҳхьыԥшымра азхазҵаз, Урыстәылеи Никарагуеи раамышьҭахь.
Аҩ-тәылак рыдәныҟатәи аусқәа рминистрцәа реиԥылара мҩаԥысит азхаҵара инашьҭырххны, иагьазкын аекономикатә, аполитикатә усеицура азҵаарақәа.
Аԥсны ахада Венесуелаҟа раԥхьатәи иофициалтә аҭаара мҩаԥысит 2010 шықәсазы, усҟан Аԥсны ахадас дыҟан Сергеи Багаԥшь.
