"Ԥшьышықәса ирылагӡаны ҳусура алҵшәақәа маҷ- маҷ иаҳбо ҳалагеит, арепатриациа, аполитика, аекономика уҳәа даҽакоума, уи ала ҳколлектив зегьы ргәы дууп. Ижәдыруеит, ҳауаажәлар зегь реиҳа иахьырацәоу Ҭырқәтәыла шакәу. Арепатриациа аусура аҩныҵаҟа ҳара иаҳҭахын аделегациақәа ицо-иаауа мацара акәымкәа, иаҳа профессионалла, ҳәынҭқарратә программак ҟаҵаны, хазы-хаз ақалақьқәа рҟны иҟоу акультуратә центрқәа рфедерациа еиҿкааны, арепатриациазы аҳәынҭқарратә еилакы иаҳа амчқәа еибыҭаны аусеицура ҟаларц. Уи аганахьала еиҿкаан астол гьежьқәа, Ҭырқәтәылаҟа изныкымкәа ҳцахьан. Зегь ҳамчала иахьа Ҭырқәтәыла Аԥсуа федерациа еиҿкааны иҟоуп. Уи ашьҭахь даҽа аамҭак алагеит арепатриациа аполитиказы, ара иҟаз аҳәынҭқарратә еилакы акәзар министрраны иҟалеит. Убасгьы иазгәасҭар сҭахуп жәохәшықәсатәи Ҭырқәтәыла иҳамаз аԥышәа ҳхы иархәаны Иорданиа аусура ҳшалагаз. Аҵыхәтәантәи ҩышықәса имҩаԥгаз аусурақәа ирыбзоураны Иорданиа инхо ҳдиаспора Аԥсны азы иаҳа аинформациа роуа иалагеит, иаауагьы рхыԥхьаӡара иацлеит. Афонд аганахьала хынтә аделегациақәа еиҿкааны Иорданиа ҳаҭааит. Иахьа агха смыхьуазар уаҟа инхо ҳауаажәлар 500-ҩык рҟынӡа аԥсуа тәылауаҩшәҟәқәа роухьеит. Ара инхо ҳауаажәларгьы иаҳа ирдыруеит Иорданиа иҟоу ҳдиаспора ирымчу, ирҭаху. Убас ауп Шьамтәыла инхо ҳдиаспора аганхьалагьы. Уи аҳәынҭқарра ҳтәыла ахьыԥшымра азханаҵарц зегь реиҳа аџьабаа збаз Уалид Маршьан аԥхьа днаргыланы хџьынџьуаа роуп", -ҳәа азгәеиҭеит Гогәуа.
"Жәларбжьаратәи афонд Аԥсны" ахада убасгьы дрылацәажәеит рдырра, иҟарҵаз ааԥхьарақәа ирыбзоураны аеконмика аганахьала иалыршаз апроектқәа ртәы.
Шәазыӡырҩы аудио. Иаҳа инеиҵыху аицәажәара шәаҳар шәылшоит арадио Sputnik Аԥсны аефир аҟны.
