АҞӘА, хәажәкыра 25 – Sputnik. ЕАА рхада Дональд Трамп Twitter аҿы иҩуеит Вашингтон Голантәи аҳаракырақәа Израиль иатәны иахәаԥшыроуп ҳәа, уи ашәарҭадара азҵаарақәа ҵаҵӷәыс иҟаҵаны.
After 52 years it is time for the United States to fully recognize Israel’s Sovereignty over the Golan Heights, which is of critical strategic and security importance to the State of Israel and Regional Stability!
— Donald J. Trump (@realDonaldTrump) 21 марта 2019 г.
Израиль аԥыза-министр Биниамин Нетаниаху Вашингтонҟа днеираны дыҟоуп Трамп иаԥшьгамҭазы иҭабуп ҳәа иеиҳәарц.
Иара фырхаҵарак аҳасаб ала дахәаԥшуеит Америка ахада иҟаиҵаз аҳәамҭа, иара убасгьы иҳәеит "Иран Израиль ақәгаразы Шьамтәыла плацдармк аҳасаб ала ахы ианархәоит" ҳәа.
"Трамп Голантәи аҳаракырақәа рганахьала, иара убас Шьамтәыла, Иран ирыдҳәалоу аҭагылазаашьақәа, ашәарҭадареи аԥшыхәреи рзы ҳусеицуреи рзы сиҿцәажәараны сыҟоуп", - иҳәоит Нетаниаху.
Дамаск акәзар, Трамп иҳәамҭа иарбанзаалак зинтә шьаҭак амам ҳәа аҳәамҭа ҟанаҵеит.
"Шьамтәыла ари аҳәамҭа аиӷаратә ҟазшьа змоу, ҭакԥхықәра зцым, изызхәыцым шьаҿаны иаԥхьаӡоит. Уи Мрагылара ааигәеиԥш, адунеи зегьы ашәарҭадара ҵнашәаауеит. Америка ахымҩаԥгашьа ЕАР Ашәарҭадаратә хеилаки Ассамблеиа хадеи Голантәи аҳаракырақәа рызҵаара аганахьала ррезолиуциақәа еиланагоит. Аҳәамҭа ЕАР аԥҟаԥҵәеи жәларбжьаратәи азинқәеи акала ирықәшәом", - ҳәа ЕАР иҟоу Шьамтәыла ахаҭарнак Башар аль-Джаафари иажәақәа аанагоит амаҵзура РИА Новости.
Урыстәыла Адәныҟатәи аусқәа рминистрра аофициалтә хаҭарнак Мариа Захарова аҳәамҭа ҟалҵеит Голантәи аҳаракырақәа рыстатус аԥсахра ЕАР аӡбамҭақәа ӷәӷәала еиланагоит ҳәа.
Евроеидгыла адипломатиатә корпус аиҳабы Маиа Косианчич иазгәалҭеит Евроеидгыла Голантәи аҳаракырақәа Израиль иахәҭакны ишамыхәаԥшуа.
Голантәи аҳаракырақәа Шьамтәыла иахәҭакын 1967 шықәса рҟынӡа. Уи ашьҭахь арҭ аҳаракырақәа Израиль анапахьы иаанагахьан аибашьрақәа ирылҵшәаны. Анаҩс, 1973 шықәсазтәи аидыслара ашьҭахь, еицеиқәшаҳаҭны аҩ-ҳәынҭқаррак рарбџьармчқәагьы алыргахьан. 1974 шықәсазы ЕАР аҭынчрашьақәыргыларатә ар алагалан. 2013 шықәсазы атеррористцәа аналала ашьҭахь, ЕАР рымчқәа арҭ адгьылқәа рҟынтәи иқәыргеит. 2018 шықәсазы Шьамтәыла Израиль иазааигәоу апровинциа Ель-Кунеитра анапахьы иаанагеит. Убри ашықәсазы ЕАР аҭынчреиқәырхаҩцәа ҩаԥхьа ари азона ахылаԥшра иалагеит.
