АҞӘА, хәажәкыра 28 - Sputnik. Израиль аҳаирпланқәа рыла Алеппо араион Шеих-Наджар иалахысуан ҳәа аҳәамҭа ҟаиҵеит иааиԥмырҟьаӡакәа ООН иҟоу Шьамтәыла ахаҭарнак Башар аль-Джаафари.
Ажәылара мҩаԥган Дамаск ажәалагалала ООН Ашәарҭадаратә хеилак Голантәи аҳаракырақәа ирызкны аилацәажәара анымҩаԥыргоз аамҭазы. Шьамтәыла аҳауаҽацәыхьчаратә маҵзурақәа иаԥдырҟәҟәааит Израильтәи ажәылара.
РИА Новости адыррақәа рыла Шеих-Наджара адагьы ажәылара иахықәкыз аҳаиртә баӷәазеи аиланхарҭа Джибрини роуп.
Аҳәынҭқарратә телеканал Ikhbariya адыррақәа рыла ажәылара хацыркын асааҭ 23:00 рзы. Убри аан аканал ишаанацҳауа ала иҭахази ахәра заузи ыҟам. Израильтәи агазеҭ Jerusalem Post акәзар жәаҩыла ауаа ҭахеит ҳәа аҳәоит.
Асоциалтә ҳақәа рҿы ицәырҵыз авидеоқәа рҟны иубарҭоуп амца зку ахыбрақәа, иуаҳауеит атҟәацбыжьқәа.
Урыстәыла Адәныҟатәи аусқәа рминистрраҿы аҳаиртә жәылара ҵаҵӷәы змам изакәаным жәылароуп ҳәа ахырҳәааит.
