АҞӘА, хәажәкыра 28 – Sputnik, Асмаҭ Ҵәыџьԥҳа. Аԥснытәи амузыкантцәа қәыԥшцәа Мариа-Емилиа Терзиан-Хагԥҳаи Барас Кәыџбеи алахәхараны иҟоуп IX Жәларбжьаратәи аиндаҭлара-фестиваль " La Noche en Madrid 2019".
Жәларбжьаратәи аиндаҭлара-фестиваль " La Noche en Madrid 2019" мҩаԥысуеит Мадрид, хәажәкыра 29 инаркны мшаԥымза 2 рҟынӡа ҳәа аанацҳауеит Аԥсны акультуреи аҭоурых-культуратә ҭынхақәа рыхьчареи рзы аминистрра аофициалтә саит.
Апрограмма алахәхаразы аскрипкарҳәаҩы Мариа-Емилиа Терзиан-Хагԥҳа иалылхит Никколо Паганини ирҿиамҭа "Вечное движение", Генрик Вениавски ирҿиамҭа "Легенда", аԥсуа композитор Пиотр Петров ирҿиамҭа "Тарантелла".
"Аиндаҭлара ҳахьалахәхо даара иҭакԥхықәроуп. Сара исҭахуп Аԥсны ахьӡала ҩаӡара ҳаракыла ақәгылара сылсыршарц. Даара сҭынчым", - ҳәа лҳәоит Мариа-Емилиа Терзиан-Хагԥҳа.
Мадридтәи афестиваль ахь ицо аԥсуа делегациа иалахәхоит Аԥсны зҽаԥсазтәыз артистка Нинель Бжьаниаԥҳа, Аԥснытәи аҳәынҭқарратә акамертә оркестр анапхгаҩы Давид Терзиан, Аԥсны зҽаԥсазтәыз артистка Ольга Хагԥҳа.
"La Noche en Madrid" есышықәсатәи музыкатә фестивальуп.
