АҞӘА, мшаԥы 5 — Sputnik, Сариа Кәарцхьиаԥҳа. Раԥхьаӡа акәны Аԥснытәи аҳәынҭқарратә университет аҿы мшаԥы 12-14 рзы абитуриентцәа рзы имҩаԥгахараны иҟоуп аолимпиада ҳәа Sputnik иазеиҭалҳәоит аԥсуа литература акафедра аиҳабы Диана Џьынџьалԥҳа.
"Абитуриентцәа афакультетқәа зегьы рҿы рыҽԥыршәар ҟалоит. Уажәы ауниверситет аҿы афакультетқәа ааба аус руеит. Аиааира зго ироуеит алшара ԥышәарада аҵараиурҭа аҭалара, ԥхьаҟа хәыда-ԥсада аҵараҵара", - лҳәоит лара.
Мшаԥымза алагамҭазы ААУ арҵаҩцәа Аԥсны араионқәа зегьы ирҭааит, аушьҭымҭацәа ирԥылеит, аҵараиурҭа аӡбахә, аусушьа рзеиҭарҳәеит.
"Ареспублика аушьҭымҭацәа ирзеиҭаҳҳәеит ауниверситет аԥсҭазаара, идҳарбеит ароликқәа. Иахьа, ауниверситет аҭагылазаашьа бзиа амоуп. Аҵаратә программақәа урыстәылатәи астандартқәа ирықәшәоит. Аҿар гәахәарыла иаҳзыӡырыҩуан. Ирацәаҩхеит ҳара ҳахь зхы зырхар зҭаххаз", - еиҭалҳәоит акафедра аиҳабы.
Аԥснытәи аҳәынҭқарратә университет аҿы мшаԥы 12-14 рзы абитуриентцәа рзы имҩаԥгахараны иҟоуп аолимпиада. Аиааира зго ироуеит алшара ԥышәарада аҵараиурҭа аҭалара, ԥхьаҟа хәыда-ԥсада аҵараҵара.
