АҞӘА, мшаԥы 18 – Sputnik, Бадраҟ Аҩӡба. Акциа "Абиблиоҵхы" мҩаԥысраны иҟоуп Иван Папасқьыр ихьӡ зху Амилаҭтә библиотекаҿы мшаԥы 22 асааҭ 10:00 инаркны асааҭ 23:00 рҟынӡа ҳәа Sputnik иазеиҭеиҳәеит абиблиотека аиҳабы Борис Ҷолариа.
"Абиблиоҵхы" сынтәа атеатр атема иазкуп, ауснагӡатәқәагьы актиорцәеи арежиссиорцәеи ирызкхоит. Ҳара иӡыраагараны ҳаҟоуп атеатри адраматургиеи ирызку ашәҟәқәа. Ҳуснагӡатә иалахәхоит Аҿар ртеатргьы", - еиҭеиҳәоит иара.
Акциа "Абиблиоҵхы" рхы аладырхәуеит ашколхәыҷқәа, астудентцәа, аҵарауаа уҳәа еиуеиԥшым абиԥарақәа ирыҵаркуа ҳауаажәлар, иҳәоит Борис Ҷолариа.
"Арахь ҭаацәала иааиуеит. Ҳбиблиотека аихагылақәа рыԥшьбагьы акциа иазырхиахоит. Абиблиотека аҭааҩцәа рзы еиҿкаахоит ацәыргақәҵа, Миха Лакрба иновеллақәа, амультфильмқәа дырбара уҳәа даара аинтерес зҵоу еиуеиԥшым аусмҩаԥгатәқәа ҟалоит", - азгәеиҭеит абиблиотека аиҳабы.
Афотоцәыргақәҵа "Аԥсны зҽаԥсазтәыз атеатр артистцәа", ашәҟәытә цәыргақәҵа "Атеатр аҭоурых", ахәыҷтәы театр ақәгылара: "Х-расацк", абалет ақәыргыламҭа "Золушка", атеатралтә студиа ақәгыламҭа "Акәашара амҩа", ахәмарра-викторина "зегь раасҭа иҟәышу", иогазы амастер-класс – абарҭ зегьы аҩбатәи аихагылаҿы аҭыԥ роуеит.
Ахԥатәи аихагылаҿы ашәҟәытә цәыргақәҵа аартхоит. Абраҟа аҭааҩцәа акинозал аҿы идырбахоит афильм "Миха Лакрба. 7 Новеллак".
Аԥшьбатәи аихагылаҿы имҩаԥгахоит ацәыргақәҵа: "Атеатра аԥсуа драматургиеи". Иқәгылоит Аҿар ртеатр артистцәа. Актиортә ҟазара амастер-класс мҩаԥгахоит.
Афестиваль "Абиблиоҵхы" азырхоуп ауааԥсыра ашәҟәы радԥхьалара. Раԥхьаӡа акәны, 2017 шықәса лаҵарамзы иара мҩаԥысит Иван Папасқьыр ихьӡ зху Амилаҭтә библиотекаҿ.
