АҞӘА, мшаԥы 19 – Sputnik. Ассоциациа "Аԥсны аҩызцәа Рлига" Аԥсны алхрақәа раан наԥшыҩцәак рыҳасабала "Ҟрым аҩызцәа Рыклуб" ахаҭарнакцәа ааԥхьара рырҭеит ҳәа радио Sputnik иазеиҭеиҳәеит Апарламент адепутат Асҭамыр Логәуа.
Аҩганкгьы реиԥылара мҩаԥысит мшаԥы 18-20 рзы Ҟрым имҩаԥысуа Иалтатәи жәларбжьаратәи аекономикатә форум аҳәаақәа ирҭагӡаны.
Логәуа иажәақәа рыла, Аклуб "Ҟрым аҩызцәа" иаҵанакуеит Европа, Азиа, Латынтәи Америка рҟынтәи 70 тәыла рҟынӡа.
"Ас ала ҳара аклуб ахаҭарнакцәа зегьы Аԥсны аинтересқәа ирыдҳаԥхьалоит. Аклуб иалахәуп Европа, Азиа, Латынтәи Америка рҟынтәи ауаажәларратә усзуҩцәа, аполитикцәа. Иҟоуп Африка ахаҭарнакцәагьы. Ҳара асасцәа рацәаҩны ҳарзыԥшуп. Иаҳҭахуп адунеи зегьы ирбарц ҳтәылаҿы алхрақәа шымҩаԥысуа. Иаҳҭахуп адунеи иадырырц ҳхықәкқәа", - иҳәоит иара.
Логәуа ишиҳәо ала, Аклуб алахәылацәеи дареи реиԥылара ашьҭахь Шьамтәыла, Бырзентәыла, Швециа, Норвегиа, Италиа, Ливан рхаҭарнакцәа ааԥхьара рыдыркылеит.
Урҭ Аԥсныҟа раара аус аиҿкаара иаарласны иалагоит. Адепутат игәаанагарала, дара ирыбзоураны ҳтәылахь аинтерес еизҳауеит.
"Ҟрым аҩызцәа Рклуб" 2017 шықәса рзы иаԥҵан. Иахьазы иара еиднакылоит 70 тәылеи еиҿкаареи: Австралиа, Австриа, Аргентина, Бельгиа, Болгариа, Бразилиа, Великобританиа, Германиа, Бырзентәыла, Израиль, Индиа, Иран, Италиа, Китаи, Литва, Норвегиа, Палестина, Сербиа, Шьамтәыла, ЕАА, Ҭырқәтәыла, Украина, Франциа, Чехиа, Швеицариа, Иапониа уҳәа егьырҭгьы.
2018 шықәса мшаԥымзазы Аԥсны "Ҟрым аҩызцәа Рыклуб" иалахәылахеит.
