"Ҳпавилион аҟны иӡыргоуп аԥсуеи аурыс шәҟәыҩҩцәеи ХХ ашәышықәсазы ирыбжьаз акультуратә еимадарақәа аазырԥшуа аҭоурыхтә фактқәа. Амузеи аусзуҩцәа шьыжьнаҵы инаркны аус руеит, иҟоуп авидеонҵамҭақәа, абуклетқәа, аӡыргаратә материалқәа рацәаны. Аҭааҩцәа аурыси аԥсуеи шәҟәыҩҩцәа реимадара иаҿырԥшны ирбар рылшоит ҩ-милаҭқ, ҩ-культурак шаҟа аҿиара аиуз иҳаҩсыз ашәышықәсазы. Ари аконцепциа амузеитә форум даара ианаалоит, избанзар амузеиқәа рацәаны иӡыргоуп, амилаҭқәа реимадара, реиҿцаара тема хаданы иҟоуп. Афорум хықәкыс иамоуп иалахәу шә-музеик рҟынӡа еицырзеиԥшу ауадаҩрақәа, аҿыцрақәа рылацәажәара", - лҳәеит Арсалиаԥҳа.
Аминистр агәыӷра аалырԥшит афорум иалахәу Гәлиа ихьӡ зху амузеи аусзуҩцәа аԥхьаҟа русураҟны ихырҳагахо ахшыҩҵак ҿыцқәа, агәҭакқәа рызцәырнагап ҳәа.
"Интермузеи -2019" Урыстәыла аҳҭнықалақь ацәыргақәҵатә зал "Манеж" аҟны иаатит лаҵара 30 рзы. Афорум мҩаԥыслоит рашәарамза ҩбанӡа.
